जोरथाङ: सिटिजन एक्सन पार्टी (क्याप) सिक्किमको सोरेङ जिल्ला कार्यकारिणी परिषद्को बैठक आज जोरथाङस्थित पार्टीको सर्कल कार्यालयमा सम्पन्न भएको छ। सोरेङ जिल्ला अध्यक्ष पीडी शेर्पाको अध्यक्षतामा बसेको बैठकमा पार्टीका वरिष्ठ नेतृत्व र पदाधिकारीहरूको उपस्थिति थियो।
बैठकमा जिल्ला तहका कार्यक्रम तथा संगठनात्मक गतिविधिसम्बन्धी विविध विषयमा विस्तृत छलफल गरिएको थियो। एसीईसी अध्यक्षहरूले आ–आफ्ना निर्वाचन क्षेत्रका तृणमूल तहका गतिविधि, सार्वजनिक सरोकार र संगठनात्मक प्रगतिबारे प्रतिवेदन प्रस्तुत गरे। यस अवसरमा नयाँ नियुक्त पार्टी पदाधिकारीहरूलाई नियुक्ति आदेश औपचारिक रूपमा हस्तान्तरण गरिएको थियो।
बैठकपछि जारी गरिएको प्रेस विज्ञप्तिमा सोरेङ जिल्लाका जनतालाई प्रत्यक्ष असर गर्ने सबै स्थानीय मुद्दामा पार्टी सक्रिय, उत्तरदायी र मुखर रूपमा उभिने निर्णय गरिएको उल्लेख छ। साथै, तृणमूल तहको सहभागिता सुदृढ गर्न र जनसम्पर्क विस्तार गर्न जिल्लाका सबै निर्वाचन क्षेत्रमा व्यापक सदस्यता अभियान सञ्चालन गर्ने निर्णय पनि गरिएको जनाइएको छ।
बैठकलाई सम्बोधन गर्दै जिल्ला महासचिव पबिन हाङ सुब्बाले महालेखा परीक्षक (सीएजी) को प्रतिवेदनले सिक्किम स्टेट ब्याङ्कलाई गम्भीर निगरानीमा राखेको विषयप्रति ध्यानाकर्षण गराए। सीएजीका अवलोकनलाई सामान्य टिप्पणीका रूपमा होइन, संवैधानिक चेतावनीका रूपमा लिनुपर्ने उनले बताए। वित्तीय अनुगमन र शासनमा असफलता हुनु जनविश्वासको उल्लङ्घन भएको उनको भनाइ थियो। उनले प्रतिवेदन सदनमा प्रस्तुत गरेकोमा महालेखा परीक्षकप्रति पार्टीको तर्फबाट धन्यवाद व्यक्त गरे।
युवा परिषद्की उपाध्यक्ष इडु छिरिङ भोटियाले महिलामाथि हुने अनलाइन उत्पीडनका घटनामा भएको वृद्धि प्रति कडा निन्दा गरिन्। राष्ट्रिय महिला आयोगको हस्तक्षेपपछि पनि दोषीमाथि कारबाही गर्न सिक्किम पुलिस उदासीन देखिएको र प्रभावकारी अनुगमनको अभाव रहेको भन्दै उनले गम्भीर चिन्ता व्यक्त गरिन्। यस्तो निष्क्रियताले अपराधीलाई हौसला मिलेको र महिलाको सुरक्षा तथा गरिमामाथि गम्भीर खतरा उत्पन्न भएको उनको भनाइ थियो।
सभाध्यक्ष पीडी शेर्पाले सिक्किम लोकसेवा आयोगमार्फत भएका नियुक्तिप्रति पनि गम्भीर असन्तोष जनाए। पारदर्शिता, मेरिट र निष्पक्षता कायम राख्नुपर्ने संवैधानिक निकायले युवा आकांक्षीहरूको संवैधानिक अधिकार जोगाउन असफल भएको आरोप उनले लगाए। साथै, क्याप–सिक्किमको चौथो स्थापना दिवस आगामी २६ जनवरी २०२६ मा मनाइने जानकारी दिँदै सो अवसरका लागि सोरेङ जिल्लामा हुने तयारीको समीक्षा गरिएको पनि उनले बताए।