सिड्नी: अष्ट्रेलियाको सिड्नीस्थित बोन्डाइ बीचमा यहुदी पर्व हानकाको अवसरमा आयोजित कार्यक्रममा लक्षित गरी गरिएको बन्दुक आक्रमणमा कम्तीमा ११ जनाको ज्यान गएको छ। न्यू साउथ वेल्स प्रहरीले उक्त घटनालाई आतङ्कवादी आक्रमणका रूपमा सूचीकृत गर्दै प्रतिआतङ्कवाद इकाइमार्फत गहन अनुसन्धान थालेको जनाएको छ।
पुलिसका अनुसार स्थानीय समयअनुसार साँझ ६ः४७ बजे बोन्डाइ बीचको आर्चर पार्क क्षेत्रमा गोली चलेको जानकारी प्राप्त भएको थियो। घटनामा एक जना आक्रमणकारी प्रहरी कारबाहीमा मारिएका छन् भने अर्को एक जना गम्भीर अवस्थामा अस्पतालमा उपचाररत छन्। तेस्रो व्यक्तिको संलग्नता छ वा छैन भन्नेबारे अनुसन्धान जारी छ।
पुलिसले सन्दिग्ध आक्रमणकारीसँग सम्बन्धित कारबाट विस्फोटक सामग्रीहरू फेला परेको पुष्टि गरेको छ। ती सामग्रीलाई बम डिस्पोजल टोलीले निष्क्रिय बनाउने काम गरिरहेको छ।
न्यू साउथ वेल्सका प्रिमिअर क्रिस मिन्सले उक्त आक्रमण सिड्नीको यहुदी समुदायलाई लक्षित गरी गरिएको बताए।
उनले भने, “यो शान्ति र उत्सवको समय हुनुपर्ने थियो, तर एक भयावह र दानवी आक्रमणले सबै कुरा तहसनहस बनायो।”
अष्ट्रेलियाका प्रधानमन्त्री एन्थनी अल्बनीजीले घटनालाई “अत्यन्त स्तब्ध तुल्याउने र पीडादायी” भन्दै कडा निन्दा गरेका छन्।
उनले घृणा र यहुदीविरोधी हिंसाका लागि अष्ट्रेलियामा कुनै स्थान नरहेको स्पष्ट पारे।
घटनास्थलमा एक हजारभन्दा बढी मानिस सहभागी रहेको कार्यक्रम चलिरहेको थियो। आक्रमणपछि क्षेत्र पूर्ण रूपमा सिल गरिएको छ र सुरक्षा व्यवस्था कडा बनाइएको छ।