गान्तोक: सिङताम–खाम्दोङ निर्वाचन क्षेत्रका विधायक तथा राज्य सडक एवं पुल विभागका मन्त्री एनबी दाहालले सिङताम ब्याडमिन्टन संघद्वारा आयोजना गरिएको शीतकालीन ब्याडमिन्टन शिविरको आज उद्घाटन गरेका छन्। गान्तोकस्थित भीआईपी कोलोनीमा रहेको आफ्नै सरकारी निवासमा आयोजित संक्षिप्त समारोहबीच मन्त्री दाहालले शिविरको उद्घाटन गरेका हुन्।
विधायकको प्रायोजन तथा सिङताम नगर पञ्चायतको सहयोगमा सञ्चालन गरिएको उक्त शिविर उद्घाटन कार्यक्रममा मन्त्री दाहालकी धर्मपत्नी सबिना राई दाहाल, सिङताम नगर पञ्चायतका अध्यक्ष सुरेश तामाङ, ओएसडी शर्मिला छेत्री, सिङताम ब्याडमिन्टन संघका अध्यक्ष तथा महासचिव, युवा ब्याडमिन्टन खेलाडीहरू र पार्टीका कार्यकर्ताहरूको उपस्थिति रहेको थियो।
मन्त्री दाहालको सहयोगमा सञ्चालनमा आएको शिविरले लामो शीतकालीन बिदाको समयमा विद्यार्थीहरूलाई रचनात्मक तथा अनुशासित गतिविधिमा संलग्न गराउने उद्देश्य राखेको छ। यसले विद्यार्थीहरूलाई लागूऔषध दुरुपयोगलगायतका कुलतहरूबाट टाढा राख्न सहयोग पुग्ने अपेक्षा गरिएको छ।
शिविर मुख्यमन्त्री प्रेमसिंह तामाङको ‘लागूऔषधमुक्त, फिट र स्वस्थ सिक्किम’ निर्माण गर्ने परिकल्पनाअनुरूप खेलकुद संस्कृतिको विकास गर्दै स्वस्थ जीवनशैली प्रवर्द्धन गर्ने लक्ष्यसहित सञ्चालन गरिएको बताइएको छ।
कार्यक्रममा सम्बोधन गर्दै मन्त्री दाहालले विद्यार्थीहरूलाई शिविरको अधिकतम लाभ उठाउन आग्रह गर्दै भविष्यमा राष्ट्रिय तथा अन्तर्राष्ट्रिय प्रतियोगितामा आफ्नो क्षेत्र र राज्यको प्रतिनिधित्व गर्ने लक्ष्यका साथ अघि बढ्न आह्वान गरे। उनले सिङताम ब्याडमिन्टन संघ र सिङताम नगर पञ्चायतले गरेको पहलको प्रशंसा पनि गरे।