सिलिगढी: उत्तर बंगाल सीमान्तअन्तर्गत सिलिगुडी सेक्टरमा तैनाथ सीमा सुरक्षा बल (बीएसएफ)का जवानहरूले सुन तस्करीको एक ठूलो प्रयास विफल पारेका छन्। कारबाहीका क्रममा करिब १.४ करोड रुपैयाँ बराबरको सुन तथा अन्य सामग्री जफत गरिएको छ।
बीएसएफले शनिबार जारी गरेको आधिकारिक विज्ञप्तिअनुसार ड्युटीमा खटिएका जवानहरूले नम्बर प्लेट नभएको रातो हिरो स्प्लेन्डर मोटरसाइकलमा शंकास्पद गतिविधि देखेका थिए। मोटरसाइकल रोक्न खोज्दा सवार व्यक्तिले जवानहरूमाथि आक्रमण गर्ने प्रयास गरेको बताइएको छ।
आत्मरक्षाका क्रममा बीएसएफका जवानहरूले स्टन ग्रेनेड प्रयोग गरेपछि तस्कर डराएर धुलो र धुवाँको फाइदा उठाउँदै घटनास्थलबाट फरार भएको विज्ञप्तिमा उल्लेख छ।
घटनास्थलबाट एक मोटरसाइकल र एक कालो ज्याकेट जफत गरिएको छ। त्यसपछि गरिएको विस्तृत खोजीका क्रममा खैरो टेपले बेरिएका दुई वटा प्याकेट फेला परे, जसमा आठ वटा सुनका बिस्कुट (कुल तौल ९२८ ग्राम) बरामद गरिएको थियो। बरामद सुनको अनुमानित मूल्य १९ लाख ७१ हजार २०० रुपैयाँ रहेको छ।
बीएसएफका अनुसार मोटरसाइकलसहित जफत गरिएका सम्पूर्ण सामग्रीको कुल मूल्य करिब १.४ करोड रुपैयाँ पुगेको छ। जफत गरिएका सबै सामग्री थप अनुसन्धानका लागि राजस्व गुप्तचर निर्देशनालय (डीआरआई) सिलिगुडीलाई बुझाइएको छ।
बीएसएफ अधिकारीहरूले सीमामा प्रतिबन्धित वस्तुहरूको तस्करी नियन्त्रण गर्न बल पूर्ण रूपमा प्रतिबद्ध रहेको र यस्ता कारबाहीहरू निरन्तर जारी रहने बताएका छन्।