गान्ताेक: भारतीय जनता पार्टी (भाजपा) का प्रवक्ताको नेतृत्वमा प्रतिनिधि टोली र पीएचई विभागका सचिवको अगुवाइमा उच्च अधिकारीबीच आज गान्तोकमा उच्च-स्तरीय बैठक सम्पन्न भयो।
भाजपा टोलीमा प्रवक्ता साङ्गे ग्याछो भोटिया, प्रदेश सचिव साङ्गे पल्जर, एसटी मोर्चा राज्य अध्यक्ष कर्म सोनाम भोटिया, गान्तोक जिल्ला कोषाध्यक्ष जिग्मे लाचेनपा र मण्डल अध्यक्ष राजेन तामाङ सहभागी थिए। पीएचई विभागको टोलीमा सचिव सैलेन्द्र शर्मा, प्रधान मुख्य अभियन्ता संजीव राई लगायत अन्य अधिकारीहरू उपस्थित थिए।
बैठकको मुख्य एजेन्डा गान्तोकका बासिन्दाले वर्षौंदेखि भोगिरहेको गम्भीर र दीर्घकालीन खानेपानी अभावको विषयमा विभागीय जवाफदेही सुनिश्चित गर्नु रहेको थियो।
पीएचई विभागका अधिकारीहरूले संकटको गम्भीरता स्वीकार गर्दै कार्यको कठिनता र स्थल-विशेष चुनौतीहरूलाई प्रमुख अवरोधको रूपमा प्रस्तुत गरे। भाजपा सिक्किमले निरन्तर र पर्याप्त खानेपानी आपूर्ति सरकारद्वारा सुनिश्चित गर्नुपर्नेमा जोड दियो।
जवाफमा पीएचई विभागले २४×७ पानी उपलब्ध गराउनु आफ्नो प्रमुख उद्देश्य रहेको र यस लक्ष्य प्राप्तिका लागि महत्वपूर्ण प्रयासहरू अघि बढाइरहेको जनाएको छ।