नयाँ दिल्ली: युक्रेनका राष्ट्रपति वोलोदिमिर जेलेंस्कीले अमेरिकाको ट्रम्प प्रशासनले ल्याएको शान्ति योजनामा भइरहेको संशोधन “सकारात्मक दिशामा अघि बढेको” बताउँदै पेरिसमा फ्रान्सेली राष्ट्रपति इम्यानुएल माक्रोँसँग भेटवार्तापछि आशावादी टिप्पणी गरेका छन्।
जेलेंस्कीका अनुसार संशोधित खाका “पहिलेभन्दा बढी व्यावहारिक र सन्तुलित” देखिन थालेको छ।
उता, रूसले पोक्रोभ्स्क शहर कब्जा गरेको दाबी गरिरहेका बेला जेलेंस्कीले “लडाइँ अझै जारी” रहेको प्रतिक्रिया दिएका छन्।
माक्रोँले वार्तालाई “युरोपको सुरक्षा ढाँचाको भविष्य निर्धारण गर्ने सम्भावित मोड” का रूपमा व्याख्या गरेका छन्।
यसैबीच, क्रेमलिनले रूसी राष्ट्रपति भ्लादिमिर पुतिन मंगलबार अमेरिकी दूत स्टीभ विटकॉफसँग भेट्ने पुष्टि गरेको छ। विटकॉफले ट्रम्पलाई कसरी राजी गराउने भन्ने विषयमा पुतिन पक्षलाई सुझाव दिएको रिपोर्टपछि उनी विवादमा छन्।
ट्रम्पको आलोचित २८–बुँदे योजना अब “संकल्पना मात्रै भएको” र पुनः परिमार्जन भइरहेको ट्रम्प प्रशासनले जनाएको छ।
रूसले ३२ युक्रेनी ड्रोन खसालेको दाबी गर्दै युक्रेनमाथि तेल संरचना लक्ष्य गरी आक्रमण गरिरहेको आरोप लगाएको छ।
ड्नीप्रोमा रूसी मिसाइल प्रहारमा चार जनाको मृत्यु भएको युक्रेनले जनाएको छ।