खरसाङ: खरसाङको वार्ड नम्बर १० मा रहेको बुध्द ग्रामस्थित सुरभि परिवारको २५ वर्ष पुगेको अवसरमा रजत जयन्ती अन्तर्गत नानीहरुका लागि म्याराथनको आयोजना गरिने भएको छ।‌ २००० सालमा स्थापना भएको सुरभि परिवारको तर्फबाट आईतवार खरसाङमा पत्रकार सम्मेलन आयोजना गरेर सुरभि परिवारको पदाधिकारीहरुले उक्त जानकारी गराएका छन्। यस विषयमा क्षेत्रीय सभासद श्याम शेर्पाको विशेष उपस्थितिमा सुरभि परिवारको सभापति रिता प्रधान, सचिव नर्बु गोले, सह सचिव ईशा गुरुङ थापा, कानुनी सल्लाहकार रतन शेर्पा, कोषाध्यक्षा बन्दना छेत्री लगायत अन्यहरु उपस्थित भएर सुरभि परिवारको रजत जयन्तीको अवसरमा आगामी २८ दिसम्बर २०२५ मा नानीहरुका लागि म्याराथनको आयोजना गरिने जानकारी गराएका छन्। उक्त म्याराथन खरसाङको वार्ड नम्बर १० मा अवस्थित बुध्द ग्रामबाट शुरु भएर मन्टिभियट हुँदै बाईपास रोड भएर पंखाबारी रोडबाट खरसाङ बजार हुँदै पार्क लोकेशन भएर पुन: बुध्द ग्राममा पुगेर समाप्त हुने जानकारी गराइएको‌ छ। उक्त म्याराथन ६ वर्षदेखि ९ र १० देखि १२ वर्षसम्म गरेर दुईवटा क्याटोगरीमा आयोजना गरिने र यसको लागि १ दिसम्बरदेखि १५ दिसम्बरसम्म पञ्जीकरण गर्न सकिने भएको जानकारी गराइएको छ। यस विषयमा पत्रकारहरुसित कुराकानी गर्दै क्षेत्रीय सभासद श्याम शेर्पा, सुरभि परिवारको सभापति रिता प्रधान, सचिव नर्बु गोले र कानुनी सल्लाहकार रतन शेर्पाले सुरभि परिवारको रजत जयन्तीको अवसरमा नानीहरुको लागि म्याराथनको आयोजना गरिने र यसको लागि खरसाङ र वरिपरिका सबै नानीहरुलाई सहभागिताको लागि आह्वान् गरेका छन्। वक्ताहरुले सुरभि परिवारको रजत जयन्तीको उपलक्ष्यमा नानीहरुलाई सामाजिक सञ्जालबाट टाडा लानलाई साथै नानीहरुलाई सिर्जनात्मक कार्यमा सक्रिय गराउनलाई यो कार्यक्रम आयोजना गरिएको जानकारी गराएका छन्। यसको साथै सभासद श्याम शेर्पाले सुरभि परिवारको रजत जयन्तीको उपलक्ष्यमा हार्दिक बधाई तथा शुभकामना व्यक्त गरेका छन्।