तीनधारे: घुम्ती चियाबारीमा भईरहेको नगदराशि फुटबल टुर्नामेन्टको उपाधि रोयल एफसीले जितेको छ। तीनधारे महानदी समष्टिको घुम्ती चियाबारीको खेल मैदानमा युनाइटेड घुम्ती स्पोर्टिङ्ग क्लबको आयोजनामा गत १२ अक्टोबरदेखि शुरु भएको नगदराशि फुटबल टुर्नामेन्टको आज फाइनल खेल रोयल एफसी र अलिबक्स सेभेन खरसाङबीच सम्पन्न भएको छ। उक्त खेलमा रोयल एफसी १-० को अन्तरले विजय बनेका छन्।। यस फाइलन खेलमा रोयल एफसीको तर्फबाट एक मात्र गोल निवेश राणाले गरेका थिए भने यसै गोलको दममा रोयल एफसी १-० अन्तरले विजयी हुँदै च्याम्पियन बनेका छन्। फाइनल खेलमा मुख्य अतिथिको रुपमा तीनधारे महानदी समष्टिको सभासद नवराज छेत्री उपस्थित रहेका थिए। विशिष्ट अतिथिको रुपमा घुम्ती चियाबारीको प्रबन्धक जजर चौधरी, महानदी ग्राम पञ्चायतको प्रधान पासाङ शेर्पा, भूतपूर्व फुटबल खेलाडी सुकराज छेत्री,भूतपूर्व सैनिक लगायत स्थानीय वरिष्ठ व्यक्तिहरु उपस्थित रहेका थिए। यस फाइलनल खेलमा म्यान अफ् द म्याच रोयल एफसीको निवेश राणा चयन भएका छन्। त्यसरी नै म्यान अफ् द टुर्नामेन्ट अरुण तामाङ अनि सर्वाधिक गोलदाताको रुपमा मचेन्द्र प्रधान चयन भएका छन्। त्यसरी नै फेयर प्ले अवार्ड मिक्स अफ् बोइज सिपाहीधुरालाई प्रदान गरिएको छ भने बेस्ट गोल किपर नर्बु शेर्पा चयन भएका छन्। घुम्ती चियाबारीमा भईरहेको यस फुटबल टुर्नामेन्टमा जम्मा २० वटा विभिन्न स्थानहरुका फुटबल टोलीहरुले भाग लिएका थिए। यस फाइनल खेल विषयमा पत्रकारहरूसँग कुराकानी गर्दै आयोजक समितिको तर्फबाट बसन्त राई र मनिषकुमार प्रधानले विस्तृत रुपमा जानकारी गराएका छन्।










