गान्तोक: सत्तारुढ़ सिक्किमको मञ्जुरी पार्टी (एसकेएम) का प्रवक्ता तथा मुख्यमन्त्रीका राजनीतिक सचिव जेकब खालिङले राज्य स्वास्थ्य विभाग मन्त्री जीटी ढुङ्गेल र प्रभाकर गोलेबीच झगडा भएको भन्ने एसडीएफ पार्टीद्वारा सञ्चालित फेसबुक प्रोफाइलमा सार्वजनिक गरिएको दाबी पूर्णरूपमा गलत र आधारहीन भएको आज जारी प्रेस विज्ञप्तिमा स्पष्ट गरेका छन्।
प्रवक्ता खालिङले उक्त फेसबुक ह्यान्डलबाट फैलाइएको गैरजिम्मेवार र भ्रामक सूचनालाई अस्वीकार्य भन्दै यस्ता दाबी फैलाउनेहरू विरुद्ध तुरुन्त कारबाही गर्न पुलिसलाई आग्रह पनि गरेका छन्। उनले यस घटनाले १९९३-९४ मा एसडीएफले सिक्किमका शान्तिप्रेमी नागरिकलाई जातिको आधारमा विभाजित गरेर राज्यको जातीय सद्भावलाई कमजोर बनाएको इतिहास सम्झाउँछ भनी उल्लेख गरे।
खालिङले एसडीएफले पुरानै भेदभावपूर्ण कथाहरूलाई पुनः जीवित गर्ने प्रयास गरिरहेको आरोप लगाउँदै आजको शिक्षित र सचेत सिक्किमी समाजले यस्तो विभाजनकारी राजनीतिलाई दृढतापूर्वक अस्वीकार गर्ने विश्वास व्यक्त गरे।
उनले भने, “मुख्यमन्त्री पीएस तामाङको नेतृत्वमा एसकेएमले सबै समुदायलाई एकताबद्ध बनाएको छ र उनीहरूको मर्यादा, विकास र प्रगतिलाई प्राथमिकता दिएको छ। सत्यलाई स्वीकार गर्न असमर्थ एसडीएफले गलत सूचना र आधारहीन आरोपको सहारा लिइरहेको छ। सिक्किमका सचेत नागरिकहरूले झूट र डरको माध्यमबाट हाम्रो एकतालाई बिगार्ने प्रयासलाई सहनुहुन्न।”