खरसाङ: गोर्खाल्याण्ड क्षेत्रीय प्रशासनको प्रमुख कार्यपाल अनित थापाले खरसाङको लागि पब्लिक ग्राउण्ड उपहार दिने घोषणा गरेपछि खरसाङ महकुमा खेलकूद संघको तर्फबाट धन्यवाद ज्ञापन गरेका छन्। शनिवार खरसाङको मन्टिभियट खेल मैदानमा खरसाङ नगरपालिकाको लागि अमृत २.० पिउने पानी परियोजनाको शिलान्यास कार्यक्रममा बोल्दै पानीको समस्या समाधान गरेपछि अझैं खरसाङको लागि अस्पताल, कार पार्किङ अनि पब्लिक ग्राउण्ड पनि नयाँ वर्षको उपहार दिने घोषणा गरेका थिए। उनको उक्त घोषणाप्रति खुशी व्यक्त गर्दै खरसाङ महकुमा खेलकूद संघको तर्फबाट खरसाङमा पब्लिक ग्राउण्ड उपहार दिने घोषणाले खरसाङ क्षेत्रका लागि ठूलो उपहार रहेको बताएका छन्‌। उनको यो घोषणाप्रति खरसाङ महकुमा खेलकूद संघको सचिव निर्मल गुरुङले विशेष धन्यवाद दिएका छन्। उनले जीटीए‌ प्रमुख अनित थापाको घोषणाले खरसाङको खेलप्रेमी संघ संस्थाहरु र खेलाडीहरुलाई ठूलो आशा जागेको बताएका छन्। उनले खरसाङमा पब्लिक ग्राउण्डको लागि सर्वप्रथम खरसाङ महकुमा खेलकूद संघ (त्यसताक -खरसाङ गोर्खा पार्वत्य खेलकूद संघ) ले १९७० सालमा आवाज उठाएको‌ बताएका छन्। त्यसरी नै उनले बताए अनुसार सन् १९९० मा पनि तत्कालील सचिव दावा गोलेको अगुवाईमा राज्यको खेल मन्त्रीलाई पनि भेटेका थिए।‌ यसको राज्यकी मुख्यमन्त्री ममता ब्यानर्जीलाई पनि राज्यको खेलकूद एंव युवा मामिला मन्त्री अरुप विश्वासमार्फत् बुझाएका थिए। २०१९ तिर मन्त्री अरुप विश्वासले पनि खरसाङमा‌ पब्लिक ग्राउण्डको लागि आश्वासन दिएका थिए। उक्त भेटघाट पनि त्यसताकका जीटीएका डेपुटी चिफ् अनित थापामार्फत् भेट्न सकेको खरसाङ महकुमा खेलकूद संघको सचिव निर्मल गुरुङले बताएका छन्‌। उनले खरसाङमा‌ पब्लिक ग्राउण्डको लागि खरसाङका धेरै संघ संस्थाहरुले पनि पहल गरेको र सबैको सामुहिक पहलमा शनिवार जीटीए प्रमुख अनित थापाले खरसाङमा‌ पब्लिक ग्राउण्डको उपहार दिने घोषणाले खरसाङ क्षेत्रका सबै खेलकूद संस्थाहरु र खेलप्रेमीहरुमा खुशी छाएको पनि बताएका छन्‌।