सोरेङ: सोरेङ जिल्ला पुलिसले साइबर ठगीको गम्भीर प्रकरण समाधान गर्दै पञ्जाबस्थित अन्तरराज्यीय साइबर आपराधिक समूहसँग सम्लग्न एक आरोपीलाई पक्राउ गरेको छ। ‘डिजिटल अरेस्ट’ प्रविधिबाट दश लाख रुपियाँ ठगी भएको यस घटनामा यसै वर्ष साउन ६ (२२ अगस्ट) मा सोम्बारिया पुलिस चौकीमा उजुरी दर्ता गरिएको थियो।
जिल्ला पुलिस अधीक्षक नहकुल प्रधानद्वारा आज जारी विज्ञप्तिमा हाल विश्वभर साइबर अपराधका घटनाहरू तीव्र रूपमा बढ्दै गएको उल्लेख गर्दै सिक्किम पनि यस जोखिमबाट अछुतो नरहेकाले राज्यभर निरन्तर ‘साइबर क्राइम कन्ट्रोल’ अभियान सञ्चालन भइरहेको जानकारी दिइएको छ। उनका अनुसार विद्यालय, शैक्षिक संस्था तथा नागरिक समाजसँग समन्वय गरेर जनचेतनामूलक कार्यक्रम निरन्तर चलाइँदै आएको छ।
यसै क्रममा एक अवकाशप्राप्त सरकारी कर्मचारीलाई फोनमार्फत ‘डिजिटल अरेस्ट’ भय देखाई करिब दश लाख रुपियाँ ठगी गर्ने समूहको मागस्रोत पत्ता लगाइ आरोपीलाई ट्र्याक गरी पक्राउ गरिएको हो। पीडितले आधिकारिक साइबर अपराध पोर्टलमार्फत उजुरी दर्ता गरेका थिए।
एसपी प्रधानले सबै नागरिकलाई साइबर सम्बन्धी घटनामा तुरुन्तै www.cybercrime.gov.in, हेल्पलाइन नम्बर १९३० वा नजिकको प्रहरी कार्यालयमा सम्पर्क गर्न आग्रह गरेका छन्। उनले साइबर अपराधविरुद्ध सोरेङ पुलिसको अटुट प्रतिबद्धता कायम रहेको उल्लेख गर्दै सुरक्षित अनलाइन व्यवहार अपनाउन सबैमा आह्वान गरेका छन्।