विभिन्न संघ संस्थाहरुद्वारा श्रध्दाञ्जली अर्पण

खरसाङ: गोर्खा जन पुस्तकालय, खरसाङका वरिष्ठ आजीवन सदस्य, जागृति परिवार खरसाङका पूर्व उपाध्यक्ष तथा खरसाङ विश्वकर्मा समाजका पूर्व अध्यक्ष अनि वर्तमान प्रमुख सल्लाहकार दिलीपकुमार बराइलीको बिहीवार निधन भएको छ। १६ मार्च १९५४ मा डुवर्स, पत्थरझोड़ामा जन्मेका स्वर्गीय बराइलीको स्कूले जीवन पेदोङ सन्त जेवियर्स स्कूलमा बितेको थियो। सानैदेखि खेलकूदमा झुकाउ तथा चासो राख्ने बराइली आफ्नो समयका एक असल फुटबल खेलाडीको रूपमा चर्चित थिए। पछि कर्मचारी जीवनमा प्रवेश गरेपछि ८० को दशकमा उनी खरसाङ आए। यही उनले लक्ष्मी दियालीसँग घरजम बसाले अनि स्थायी रूपले उनले खरसाङलाई कर्मथलो बनाए। जागीरे जीवनमा उनी सेवानिवृत्ति पाउञ्जेल खण्ड युवा अधिकारीको रूपमा कार्यरत थिए। गोर्खा जन पुस्तकालयका आजीवन सदस्य रहेर उनले संस्थाको हरेक आवश्यक घड़ीमा एक समर्पित सदस्यको रूपमा सहयोगको निम्ति कम्मर कस्थे। उनीभित्र एक कलाकारमा हुने प्रतिभा पनि उत्तिकै रहेको कुरो खरसाङको सबैभन्दा पुरानो नाट्यसंस्था जागृति परिवारसँग पनि सलंग्न थिए। उनी यस संस्थाका मृत्युपर्यन्त उपाध्यक्ष पदमा आसिन थिए। सन् १९२५ मा खरसाङ विश्वकर्मा समाज नयाँ शताब्दी देख्नुभन्दा शिथिल अवस्थामा पुगिसकेको थियो। यति पुरानो समाज हुँदाहुँदै पनि यसको कुनै एक स्थायी घर वा ठेगाना थिएन। पछि २०२५ मा किरणप्रसाद दर्नाल, कमल गजमेर , सन्तोषसिँह लकान्द्री तथा हेमन्त दर्नालको एउटा उर्जावान समूहमा यिनको प्रवष्टि भएपछि समाजले नितान्त नौलो रूप पाएको थियो। उनले समाजको अध्यक्ष पद सम्हालेका थिए। यसै क्रममा सचिव केपी दर्नालसँग मिलेर समाजका हरेक दैलोमा पुगेर उनले सदस्यहरूलाई जागारूक बनाए अनि आज एक समृद्ध समाज निर्माण गर्नुमा सक्षम बने।समाजप्रति उनको योगदानहरूको मूल्याङ्कन गर्दै दलित साहित्य अकादेमीले उनलाई सन् २०१४-मा बाबासाहेब डा. अम्बेडकर फेलोसिप राष्ट्रिय पुरस्कारले सम्मानित गरेको थियो। यस वर्ष अर्थात् २०२५ मा खरसाङ विश्वकर्मा समाजले सय वर्षको ऐतिहासिक माइलखुट्टी पार गरेको थियो अनि यस सुखद अवसरमा शताब्दी महोत्सवको भव्य तयारीमा रहेकै बेला समाजले अचानक गहिरो आघात सहनुपऱ्यो। बराइली केही समयदेखि स्वास्थ्य समस्याहरूसँग जुझिरहेका थिए। उनी सिलगढ़ीको एक निजी चिकित्सालयमा सघन उपचाराधीन थिए। उपचारको क्रममा बिहीवार उनको निधन भएको छ। उनले आफूपछि दुई छोरा बुहारीहरू र नातागोताहरू छाड़ेर गएका छन्। यस दुःखद घड़ीमा समाजका वर्तमान अध्यक्ष निर्मलकुमार गहतराजको अगुवाइमा एउटा टोली उनको निवासस्थलमा पुगी शोकसन्तप्त परिवारप्रति समवेदनासहित दिवङ्गत आत्माप्रति श्रद्धासुमन अर्पण गरियो। पछि उनको निवासस्थलकै छेउमा विश्वकर्मा समाज भवनमा उनको स्मरणमा मौन धारण गरी दिवङ्गत आत्माप्रति श्रद्धासुमन अर्पण गरियो। निर्मलकुमार गहतराजको अध्यक्षतामा सम्पन्न यस शोक सभालाई समाजका प्रचार प्रसार सचिव तथा गोर्खा जन पुस्तकालयका मूल सचिव विनोद रसाइलीले सञ्चालन गरेका थिए भने सभामा गोविन्दसिँह घतानी, केपी दर्नाल, श्यामकुमार लोहार, सुष्मा सिंह दर्नाल, विजयसिंह सिञ्चुरी तथा केएम सिलालले शोक व्यक्त गर्दै स्वर्गीय बराइलीले समाजलाई दिएका योगदानलाई सम्झँदै भावपूर्ण श्रद्धासुमन अर्पण गरे। यस शोक सभामा समाजका वरिष्ठ सदस्यहरू सचिव केशवसिंह घतानी, सबिता गजमेर, इन्द्रसिँह सिङ्गौरे, पुरोहित इन्द्र बराइली, कमलसिंह श्रीवाल, किशोर सिंह,श्याम सिञ्चुरी, उमेश सिंह, दिनेश दर्नाल आदि उपस्थित थिए।
उनको निधनमा जागृति परिवारको तर्फबाट पनि श्रध्दाञ्जली अर्पण गरिएको छ। दिलीपकुमार बराइली जागृति परिवार खरसाङका पूर्व उप सभापति र सक्रिय सदस्य रहेका थिए। उनको निधनमा जागृति परिवारको पक्षमा सचिव प्रकाश प्रधानद्वारा गहिरो शोक प्रकट गरेका छन्। प्रधानले उनको निधनमा अपुरणी क्षति भएको बताएका छन्।