सांस्कृतिक परम्परा र सामुदायिक एकतामा जोड

नाम्ची: नाम्ची जिल्ला प्रशासनिक केन्द्रले नाम्ची जिल्ला पुलिसको संयुक्त तत्वावधानमा आज केन्द्र परिसरमा ‘माइन्डफुल थर्सडे’ कार्यक्रम आयोजना गऱ्यो। कार्यक्रममा पुलिस अधीक्षक कर्म ग्याम्चो भोटिया, अतिरिक्त जिल्लापाल सुभाष घिमिरे, एसडीएम निम पिन्चो भोटिया, एसडीएम वाङ्ग्याल शेर्पा, विभागीय प्रमुख र कर्मचारीहरू उपस्थित थिए।
जिल्लापाल अनुपा तामलिङको निर्देशनमा, प्रत्येक बिहीबार नाम्ची जिल्लामा ‘माइन्डफुल थर्सडे’ पालन गरिनेछ। यस अन्तर्गत प्रत्येक विभागले हरेक हप्ता एक गतिविधि आयोजना गर्नु पर्नेछ। यस हप्ताको कार्यक्रम नाम्ची जिल्ला पुलिसले सञ्चालन गऱ्यो।
कार्यक्रमको मुख्य उद्देश्य सांस्कृतिक जागरूकता प्रवर्द्धन गर्नु, सामुदायिक बन्धन सुदृढ पार्नु र दैनिक जीवनमा परम्परागत अभ्यासहरूको संरक्षणको महत्त्वलाई जोड दिनु रहेको छ। सांस्कृतिक प्रस्तुतिमा पुलिस विभागले सिक्किमको जीवन्त सांस्कृतिक धरोहर प्रस्तुत गर्दै परम्परागत मारुनी नृत्य र गीत प्रदर्शन गऱ्यो।
कार्यक्रमले समुदायमा निरन्तर एकता र सद्भाव बढाउन, सांस्कृतिक परम्परालाई जगेर्ना गर्न र मनाउन सबैलाई प्रोत्साहित गर्ने सन्देश दिएको आयोजकले जानकारी दिएको छ।