मङ्गन: काबी रोङ्गपा जीपीयूअन्तर्गत रोङ्गपा आङ्गनवाडी केन्द्रमा आज ‘बेटी बचाओ, बेटी पढाओ’ अभियानअधीनको संवेदीकरण तथा अभिसंस्करण कार्यक्रम सम्पन्न भयो। बालिका शिक्षा, स्वास्थ्य र सुरक्षित वातावरणबारे समुदायस्तरमै चेतना बढाउने उद्देश्यले आयोजित कार्यक्रममा अभिभावकदेखि स्थानीय श्रेणीका सरोकारवाला निकायको सक्रिय उपस्थिति देखियो।
कार्यक्रमका प्रमुख अतिथि जिल्ला पञ्चायत सदस्य पेमा वाङ्याल भोटियाले समुदाय–आधारित पहलहरूलाई सुदृढ गर्दै महिला तथा बालबालिकाको हितमा आवश्यक सहयोग जारी राख्ने प्रतिबद्धता व्यक्त गरे।
आङ्गनवाडी कार्यकर्ता, सहायक तथा आशा समूहको उल्लेखनीय सहभागितासहित कार्यक्रम उत्साहपूर्ण रहेको थियो।
सीडीपीओ सोनाम ल्हादेन लाचुङ्पाले योजनाका उद्देश्य, मूल घटक र समुदायले पाउने लाभबारे विस्तृत जानकारी दिँदै बालिकाको शिक्षामाथि केन्द्रित हस्तक्षेपलाई आधारभूत तहमै प्रभावकारी बनाउनुपर्ने आवश्यकता औँल्याइन्। उनले किशोरी बालिका योजनामा समेटिएका पोषण तथा गैर–पोषण दुवै पक्षबारे विस्तृत प्रस्ट्याइन्। पोषण २.० पहलका लक्ष्य, कार्यविधि तथा पोषण परिणाम सुधारमा स्थानीय कार्यकर्ताको भूमिकाबारे पनि जानकारी प्रस्तुत गरियो।
यसै गरी, प्रधानमन्त्री मातृत्व वन्दना योजनासम्बन्धी आवश्यक कागजात, प्रमाणीकरण प्रक्रिया र भुक्तानी उपलब्ध गराउने विधिबारे सहभागीहरूलाई प्राविधिक जानकारी दिइयो, ताकि पात्र लाभग्राहीले समयमा मातृत्व लाभ प्राप्त गर्न सकून्।
डीएमसी थेन्देन लाचुङ्पा, एचयूबीले सुकन्या समृद्धि योजना, एचयूबी कार्यप्रणाली तथा वन–स्टप सेन्टरको गतिविधिबारे व्याख्या गर्दै महिला तथा बालिकाले पाउन सक्ने वित्तीय सुरक्षा तथा सहयोग सेवाको महत्त्वमा जोड दिए। साथै, महिला हेल्पलाइन ‘१८१’ को पहुँच र उपयोगबारे गाउँ–वस्तीमा व्यापक जानकारी गराउन उनले सबै आङ्गनवाडी तथा आशा कार्यकर्तालाई आह्वान गरे।