काेलकत्ता: दक्षिण अफ्रिका र भारतबीच ईडन गार्डन्समा समाप्त भएको पहिलो टेस्टले भारतीय क्रिकेटमा खलबली मचाएको छ। भारतले म्याचमा केवल अढ़ाई दिनमै हारको सामना गर्नु पऱ्यो। जीतको निम्ति केवल १२४ रनको लक्ष्यलाई पीछा गर्दै टीम इण्डिया ९३ रनमा अलआउट भयो। यस निराशाजनक प्रदर्शनले नयाँ विवादलाई जन्म दिएको छ। गत १३ महिनामा भारतीय टीमको घरेलु मैदानमा यो चौथो टेस्ट म्याच हार हो। यसले खेलाड़ीहरूदेखि लिएर टीम म्यानेजमेण्टको रणनीतिसम्म प्रश्न उठाएको छ। टीम इण्डियाका मुख्य प्रशिक्षक गौतम गम्भीरले म्याच समाप्त भएपछि पीचलाई लिएर बयान दिएका थिए, जसले ईडन गार्डन्सका क्यूरेटरलाई पनि विवादमा सामेल गरेको छ। त्यसपछि पीच क्यूरेटरले पनि आफ्नो बयान दिँदा विवादले नयाँ मोड़ लिएको छ। भारतीय टीमको निराशाजनक प्रदर्शनपछि सुनिल गावस्कर र मोहम्मद कैफको साथमा अन्य धेरैजना पूर्व क्रिकेटरहरूले गम्भीरलाई निशाना बनाएका छन्। टेस्ट म्याचपछि आलोचनाको माहोल गरम हुँदा ईडन गार्डनका पीच क्यूरेटर सुजान मुखर्जीले पनि खुलेर कुरा गरेका छन्। उनले भनेका छन्, यो पीच साँच्चै खराब थिएन। मलाई पीच तयार गर्ने काम राम्ररी आउँछ अनि मैले त्यही गरे जस्तो मलाई निर्देश दिइएको थियो। यसरी मुखर्जीले उनले आफ्नो तर्फबाट कुनै मनमानी नगरेको अनि भारतीय टीम म्यानेजमेण्टको निर्देशहरू अनुसार नै सतह तयार गरेको स्पष्ट गरेका छन्। क्यूरेटरको बयानपछि कसको आदेशमा यस्तो टर्निंग, अनिश्चित र असमान बाउन्स भएको पीच तयार गरिएको थियो भन्ने प्रश्न उठेको छ। गम्भीरले म्याचपछि पीचमा कुनै खराबी नरहेको बताउँदै दबाउलाई सम्हाल्न असमर्थ भएकोमा ब्याटरहरूलाई हारको जिम्मेवार बताएका थिए तर क्यूरेटरको बयान अनि गम्भीरको विचारमा मेलले गर्दा एउटा नयाँ बहसलाई जन्म दिएको छ। भारतको हारपछि महान ब्याटर गावस्सकरको बयानले विवादलाई नयाँ दिशा दिएको छ। गावस्करले स्पष्ट शब्दहरूमा प्रशिक्षक, टीम म्यानेजमेण्ट या खेलाड़ीहरूले क्यूरेटरमाथि दबाउ दिनु हुँदैन भनेका छन्। गावस्करले भने, क्यूरेटरलाई आफ्नो काम गर्न दिनु पर्छ। उनलाई आफ्नो काम राम्ररी थाहा हुन्छ। तपाईंले उनलाई पीच यस्तो-उस्तो बनाउने निर्देश दिए कुरा उल्टा हुन सक्छ। हामी आईपीएलको उदाहरण लिन सक्छौं, जहाँ क्यूरेटरमाथि कुनै दबाउ हुँदैन तर राष्ट्रिय स्तरमा हस्तक्षेपले नतीजा बिग्रिन सक्छ। गावस्करको यस बयानले गम्भीरको रणनीति र मागहरू तर्फ इशारा गरेको स्पष्ट हुन्छ। गम्भीरलाई पूर्व क्रिकेटर कैफले पनि निशाना बनाएका छन्। कैफको भनाइअनुसार, क्यूरेटरले प्रशिक्षक गम्भीरको मागहरू अनुसार पीच तयार गरेका थिए अनि सीएबी-का अध्यक्ष सौरभ गांगुली पनि त्यसलाई स्वीकार्न वाध्य भएका थिए। कैफले भनेका छन्, गांगुली यस्तो पीच चाहँदैनन् थिए। उनले सीएबी अध्यक्ष पद सम्हाल्नको साथै ईडन गार्डन्समा स्पोर्टिंग पीच बनाउने प्रतिबद्धता व्यक्त गरेका थिए तर गम्भीरको ढिप्पीले गर्दा उनी टर्निंग विकेटको निम्ति राजी हुनु पऱ्यो। उनी पीचसँग खुशी थिएनन्। भविष्यमा यस्तो पीच ईडनमा फेरि बनिनेछैन। कैफले यसको साथमा गम्भीरको प्रशिक्षणमा टीमका खेलाड़ीहरू कुनै भरोसा बिना डरको माहोलमा खेलिरहेको दावी गरेका छन्। उनले भनेका छन्, टीम म्यानेजमेण्टको लगातार फेरबदलको रणऩीतिले ब्याटरहरूका मनोबल जमीनमा पुगिसकेको छ। शतक बनाएपछि पनि खेलाड़ीहरूका स्थान पक्का हुँदैन। यसमा हामी सरफराज खान र साई सुदर्शनको उदाहरण लिन सक्छौं। सुदर्शनले आफ्नो अन्तिम टेस्ट म्याचमा ८७ रन बनाएका थिए अनि अहिले उनले अन्तिम एकादशमा मौका पाएनन्। टीम म्यानेजमेण्टको कुनै समर्थन छैन अनि खेलाड़ीहरू डराएका छन्। यसैकारण खुलेर खेल्न सकेका छैनन्।