सिंगेल चियाबारीको जीर्णावस्थामा रहेको बाटो झट्टै निर्माण गरिने अनित थापाको घोषणा

खरसाङ: गोर्खाल्याण्ड क्षेत्रीय प्रशासनको प्रमुख कार्यपाल अनित थापाले सिंगेल चियाबारीको नयाँधुरामा एउटा नवनिर्मित सार्वजनिक भवनको उदघाटन गर्नुको साथै सिंगेल चियाबारीको सार्कीधुरा, चारधुरे, कफिबारी र बगैचाटारमा गरी जम्मा पाँचवटा नव निर्मित सार्वजनिक भवनको उदघाटन गरेका छन्‌। यसको साथै उनले सिमानाधुरामा नयाँ सार्वजनिक भवनको निर्माणको लागि शिलान्यास पनि गरेका छन्। जीटीए प्रमुख अनित थापाले सिंगेल चियाबारीको कफिबारी अन्तर्गत गोदामधुरामा पाँचवटा नव निर्मित घरहरुको पनि उदघाटन गरेका छन्‌। उक्त पाँचवटा घरहरु अग्नि पिढीत परिवारहरुको नयाँ घर निर्माण गरिएको हो। सिंगेल चियाबारीको नयाँ धुरामा नवनिर्मित सार्वजनिक भवनको निर्माण राज्य फण्ड अन्तर्गत खरसाङ सिँचाई विभागबाट गरिएको छ। यस सार्वजनिक भवनको निर्माण कार्य ४३ लाख १ हजार ५ सय ९४ रुपियाँमा गरिएको छ। उक्त सार्वजनिक भवनको उदघाटन जीटीए प्रमुख अनित थापाको विशेष उपस्थितिमा टुंग सन्त मेरिज समष्टिकाे सभासद नुरी शेर्पाले रिबन काटेर उदघाटन गरेका छन्। यस अवसरमा सार्वजनिक भवनको उदघाटन गर्न सिंगेल चियाबारी पुगेका जीटीए प्रमुख अनित थापालाई स्थानीयहरु र पार्टी कार्यकर्ताहरुले स्वागत जनाएका थिए। उक्त सार्वजनिक भवनको उदघाटन समारोहमा प्रमुख अतिथिको रुपमा गोर्खाल्याण्ड क्षेत्रीय प्रशासनको प्रमुख कार्यपाल अनित थापा उपस्थित रहेका थिए। सन्तोष तामाङले सञ्चालन गरेका थिए।‌ कार्यक्रमलाई सम्बोधन गर्दै जीटीए प्रमुख अनित थापाले सिंगेल चियाबारीको जीर्णावस्थामा रहेको बाटो झट्टै बनाई दिने घोषणा गरेका छन्। उनले पहिला यहाँ कसैले आएर रोड बनाई दिने आश्वासन दिएकोले पर्खिरहेको तर अहिलेसम्म बनाईदिएपछि स्थानीयहरुको मागमा अब यो बाटोको निर्माण कार्य चाढै शुरु हुने घोषणा गरेका छन्। आफ्नोे सम्बोधनमा अनित थापाले भने, गाउँ विकासको लागि सबैजना एक हुन सक्नुपर्छ। म सिंगेलमा भोट मांग्नु कहिले पनि आयिना। तर भोटको समयमा आएर बाटो बनाई दिन्छु भनेर वाचा गरेर पनि यहाँको बाटो बनिएन। मैले पनि अरु कसैले बनाई दिन्छ भनेर तपाईहरुले जस्तै पर्खिरहे।‌ आज यहाँ आउँदा सबैले मलाई बाटो नै बनाई मागेको छ र अब यो बाटोको निर्माण कार्य चाढै शुरु हुनेछ।’
अनित थापाले अघि भने, म सबैको जीटीए प्रमुख कार्यपाल हुँ। तपाईंहरु सबै मिलेर बस्नु हवस, गाउँको विकासको लागि एकबध्द हुन आवश्यक छ।’
उदघाटन कार्यक्रममा जीटीएको प्रमुख सल्लाहकार अमर लामाले सम्बोधन गर्दै अनित थापा अहिले जनताको दुःखेसो सुन्न चारैतिर गईरहेका छन्। उनले भ्याई नभ्याई जनताको समस्या समाधानको लागि कार्य गरिरहेको र जनताले पनि अनित थापालाई नै खोजिरहेका छन्। अमर लामाले वर्तमानमा चलिरहेको मतदाता सूचीको‌ विशेष गहन संसोधन एसआईआर सम्बन्धमा पनि सचेतनामूलक सम्भाषण दिएका थिए। कार्यक्रमलाई क्षेत्रीय सभासद नुरी शेर्पाले पनि सम्बोधन गरेका थिए।‌

यस उदघाटन कार्यक्रममा खरसाङ पञ्चायत समितिको सभापति अनु छेत्री, क्षेत्रीय सभासद नुरी शेर्पा, सन्त मेरिज ग्राम पञ्चायतको प्रधान रोशनहाङ सुब्बा, सन्त मेरिज दुई ग्राम पञ्चायतको प्रधान सहदेव तामाङ, कर्माध्यक्ष बीरेन्द्र तामाङ, भागोप्रमो टुंग सन्त मेरिज समष्टिकाे सचिव दिपेस तामाङ लगायत अन्यहरु उपस्थित रहेका थिए। यसै कार्यक्रममा जीटीए प्रमुख अनित थापाले सिंगेल चियाबारी क्षेत्रका जनसाधारण र विभिन्न संघ संस्थाहरुका प्रतिनिधिहरुसित पनि भेटघाट गर्दै जनताको विभिन्न समस्याहरु सुनेका छन्। यस अवसरमा उनलाई स्थानीयहरुले विभिन्न समस्याहरु लिएर ज्ञापन पत्र बुझाएका थिए। यस कार्यक्रममा नै टुंग सन्त मेरिज समष्टिकाे मार्गरेट्स होप क्षेत्रबाट ३२ जनाले भारतीय गोर्खा प्रजातान्त्रिक मोर्चामा सामेल हुँदै पार्टीको झण्डा थापेका छन्। यस अवसरमा सबै समर्थकहरुलाई भारतीय गोर्खा प्रजातान्त्रिक मोर्चाको केन्द्रीय महासचिव अमर लामा, नारी शक्तिका केन्द्रीय अध्यक्षा अनु छेत्री लगायत अन्यको बाहुलीबाट झण्डा प्रदान गरेर पार्टीमा स्वागत गरिएको छ। सिंगेल चियाबारीको नयाँ धुरामा नवनिर्मित सार्वजनिक भवनको उदघाटन कार्यक्रम विषयमा पत्रकारहरुसित कुराकानी गर्दै क्षेत्रीय सभासद नुरी शेर्पाले सिंगेल चियाबारीको विभिन्न स्थानहरुमा नव निर्मित सार्वजनिक भवनको उदघाटन जीटीए प्रमुख अनित थापाले गरेको बताएका छन्। उनले सिंगेल चियाबारीको जीर्णावस्थामा रहेको सडकको पनि निर्माण कार्य झट्टै गरिने जीटीए प्रमुख अनित थापाले घोषणा गरेको बताएका छन्। उनले जीटीए प्रमुख अनित थापाप्रति स्थानीयहरुको तर्फबाट धन्यवाद ज्ञापन गरेका छन्।