डुनेडिन: आयोजक न्यूजील्याण्डले पाँचौं तथा अन्तिम टी२० इण्टरनेशनल क्रिकेट म्याचमा वेष्ट इण्डिजलाई ८ विकेटले पराजित गरी ५ वटा म्याचको सिरिज ३-१ ले जित्यो। यूनिवर्सिटी ओवल मैदानमा बिहीवार टस हारेर पहिला ब्याटिङ गर्दै वेष्ट इण्डिज १८.४ ओभरमा केवल १४० रन बनाएर अलआउट भयो। त्यसपछि न्यूजील्याण्डले १५.४ ओभरमै २ विकेट गुमाएर १४१ रनको लक्ष्यलाई हासिल गऱ्यो। न्यूजील्याण्डको निम्ति ओपनर डेवोन कन्वेले अविजित ४७ रन बनाए। उनले साथी ओपनर टिम रबिन्सनसँग मिलेर पहिलो विकेटको निम्ति ७.१ ओभरमा ६९ रनको पार्टनरशीप गरेर टीमको जीत सुनिश्चित गरे। रबिन्सनले २४ बल खेलेर ५ वटा चौका र ३ वटा छक्का लगाए। पहिलो विकेटको पतनपछि कन्वेले रचिन रविन्द्रसँग दोस्रो विकेटको निम्ति ३७ रन अनि मार्क चापम्यानसँग तेस्रो विकेटको निम्ति ३५ रनको अटूट पार्टनरशीप गरेर न्यूजील्याण्डलाई जीत दिलाए। कन्वेले ४२ बल खेलेर ४ वटा चौका र एउटा छक्का लगाए। यसरी रविन्द्रले २१ र चापम्यानले अविजित २१ रन बनाए। यसअघि पहिला ब्याटिङ गर्दै वेष्ट इण्डिजको शीर्ष क्रमले फेरि एकपल्ट निराशाजनक प्रदर्शन गऱ्यो। केवल ४८ रनमा ५ विकेटको पतनपछि टीमले स्थितिलाई सम्हाल्न सकेन। आठौं नम्बरमा ओर्लिएर रोमारियो शेफर्डले २२ बलमा ३६ रन बनाएर टीमको स्कोर हेर्न लायकको बनाए। उनले ३ वटा छक्का र ३ वटा चौका लगाए। यसबाहेक रोस्टन चेसले ३८ र जेसन होल्डनले २० रनको योगदान दिए। शीर्ष क्रममा कप्तान शाई होप ११, एलिक अथानाजे १, अकीम अगस्टे ८, शेरफाने रदरफोर्ड शून्य र रोवम्यान पावेल ११ रन बनाएर आउट भए। न्यूजील्याण्डका बलरहरूमा जेकब डफीले सर्वाधिक ४ विकेट लिए। डफीले प्लेयर अव् द म्याच र सिरिजको पुरस्कार जिते।