गान्तोक: भारत र नेपाल वरिष्ठ राष्ट्रिय महिला फुटबल टोली बुधबार गान्तोकको पाल्जोर स्टेडियममा मैत्रीपूर्ण खेलमा भिड्ने भएका छन्।
दुवै टोली हिजो साँझ गान्तोक आइपुगेका थिए र सम्मान भवनमा उनीहरूको लागि विशेष रात्रिभोजको आयोजना गरिएको थियो। यस अवसरमा सिक्किमका मुख्यमन्त्री प्रेमसिंह तामाङ उपस्थित थिए।
मुख्यमन्त्री तामाङले फेसबुकमा लेखे, “सम्मान भवनमा भारत र नेपालका वरिष्ठ राष्ट्रिय महिला फुटबल टोलीहरूको सम्मानमा रात्रिभोज आयोजना गर्न पाउनु हाम्रो लागि गर्वको कुरा हो। यी प्रतिष्ठित खेलाडीहरू हाम्रो राज्य स्थापनाको ५०औं वर्षको उपलक्ष्यमा २९ अक्टोबरमा हाम्रो पाल्जोर स्टेडियममा हुने अन्तर्राष्ट्रिय मैत्रीपूर्ण खेलमा भाग लिन सिक्किममा छन्।”
उहाँले थपे कि दक्षिण एशियाली फुटबल महासंघ (साफ) का महासचिव पुरुषोत्तम कट्टेलसँग भेट्न पाउनु र प्रतिभाशाली खेलाडी तथा समर्पित प्रशिक्षकहरूसँग अन्तरक्रिया गर्न पाउनु सुखद अनुभव भएको छ। मुख्यमन्त्रीले खेलाडीहरूको जोश, अनुशासन र खेलप्रतिको प्रतिबद्धताले महिला फुटबलको बढ्दो महत्त्व देखाउँछ भनी उल्लेख गर्दै दुबै टोलीलाई आगामी खेल र भविष्यका प्रयासहरूका लागि शुभकामना दिएका छन्।