खरसाङ नगरपालिकालाई त्रिशुली संघको ध्यानाकर्षण

खरसाङ: हिजो राति खरसाङको मध्य डुमारामस्थित त्रिशुली संघ भवन नजिकै पार्क गरिएका केही गाडीहरुमा अज्ञात युवाहरूले उपद्रो गरेका छन्। प्राप्त विवरण अनुसार तीनवटा वाहनहरूमा धारिलो वस्तुले स्क्र्याच गरिएको, एउटा कारमा डेन्ट गरिएको र अर्को गाडीको टायरहरूको हावा निकालिएको बताइएको छ।
पीडित गाडीमध्येका एक प्रणय लामाका अनुसार, यो घटनामा देउसी खेल्न आएका केही युवाहरू संलग्न हुन सक्ने अनुमान गरिएको छ। उनले भने, “हामीले कसैसँग विवाद गरेका थिएनौं, तर यस्तो काम मस्तीमा रहेका केही युवाहरूले मात्र गर्न सक्छन्।”
त्रिशुली संघका अध्यक्ष शिबु प्रधानले भने, “सो क्षेत्रमा पछिल्ला केही हप्तादेखि सडकको बत्तीहरू बिग्रिएका कारण अन्धकारको फाइदा उठाउँदै असामाजिक तत्त्वहरूले यस्तो कार्य गरेका हुन्।”

उनका अनुसार संघले यसअघि नै खरसाङ नगरपालिकामा संयुक्त निवेदन बुझाएर सडकबत्ती मर्मतको माग गरेको भए पनि अहिलेसम्म कुनै कदम चालिएको छैन। संघले यस घटनाप्रति गम्भीर ध्यानाकर्षण गराउँदै नगरपालिकालाई यथाशीघ्र सम्पूर्ण क्षेत्रको सडकको बत्ती मर्मत गर्न आग्रह गरेको छ, ताकि भविष्यमा यस्ता असामाजिक कार्यहरू दोहोरिन नदिन सकियोस्।