खरसाङ: तीनधारे महानदी समष्टिको घैयाबारीस्थित ब्लु डाईमण्ड अंग्रेजी स्कूलमा विद्यार्थीहरुलाई लिएर देऊसी भैलो प्रतियोगिता सम्पन्न भएको छ। स्कूलको चारवटा हाउसहरुलाई लिएर आयोजित देऊसी भैलो प्रतियोगिता कार्यक्रममा विद्यार्थीहरुले‌ जातीय पहिरनमा रहेर देऊसी र भैलो प्रस्तुत गरेका थिए। यस प्रतियोगितामा स्कूलको चारवटा हाउसहरु क्रमैले क्यामेलिया, मेरीगोल्ड, अर्किड र लोटसका विद्यार्थीहरुले भाग लिएका थिए।

शिक्षिकाद्वय पूर्णिमा छेत्री र सुप्रिया राईले सञ्चालन गरेका यस प्रतियोगितामा निर्णायकको रुपमा शिक्षिकाहरु क्रमैले प्रेरणा गुरुङ, बिनुमा राई, सुबला छेत्री, कुर्साङ लामा आदि रहेका थिए। यस प्रतियोगितामा ब्लु डाईमण्ड अंग्रेजी स्कूलका निर्देशक बीबी थापा र प्रोप्राइटर लिला थापा विशेष रुपमा उपस्थित रहेका थिए। यस प्रतियोगिता अन्तर्गत देऊसीमा अर्किड हाउस विजय बनेका छन् भने भैलोमा लोटस र मेरीगोल्ड बराबर भएकोले दुवैलाई विजय घोषित गरिएको छ।

यस प्रतियोगितामा विजय प्रतियोगीहरुलाई स्कूलका निर्देशक बीबी थापा र प्रोप्राइटर लिला थापाको बाहुलीबाट ट्राफीहरु प्रदान गरिएको छ। यस देऊसी भैलो प्रतियोगिता विषयमा पत्रकारहरुसित कुराकानी गर्दै ब्लु डाईमण्ड अंग्रेजी स्कूलकी सह शिक्षिका पूर्णिमा छेत्रीले विस्तृत रुपमा जानकारी गराएकी छन्।