कोलकाता: ७ सेप्टेम्बरको रात भारतसहित अन्य देशहरूमा एक दुर्लभ खगोलीय घटना देख्न पाइनेछ। सो दिन पूर्ण चन्द्रग्रहण हुने भएको छ। यो ग्रहण राति ८ बजेर ५८ मिनेटमा सुरु भई सोमबार मध्यरात २ बजेर २५ मिनेटसम्म चल्नेछ।
राति ११ बजेदेखि १२ बजेर २२ मिनेटसम्म चन्द्रमा पूरै पृथ्वीको छायामा रहनेछ। त्यतिबेला चन्द्रमा ताम्र–रातो देखिनेछ, जसलाई सामान्यतया ‘ब्लड मून’ भनिन्छ।
यो पूर्ण चन्द्रग्रहण सन् २०२२ पछि देखिन लागेको सबैभन्दा लामो हो, जसको अवधि १ घण्टा २२ मिनेट रहनेछ। विशेषज्ञका अनुसार, यदि मौसम सफा भयो भने क्षितिज माथि रहेको चन्द्रमा नाङ्गा आँखाले सहजै अवलोकन गर्न सकिनेछ।
भारतमा यसअघि ८ नोभेम्बर २०२२ मा पूर्ण चन्द्रग्रहण देखिएको थियो। अर्को अवसर भने ३१ डिसेम्बर २०२८ मा मात्र आउनेछ। खगोल विज्ञहरूले यसलाई खुला र अँध्यारा ठाउँबाट हेर्न आग्रह गरेका छन्।
विशेष कुरा के हो भने सूर्यग्रहणको जस्तो विशेष चश्मा वा सुरक्षा साधन आवश्यक पर्दैन। ब्लड मून नाङ्गा आँखाले वा दूरबिनमार्फत सहजै हेर्न सकिन्छ।