काबुल: अफगानिस्तानको दुर्गम दक्षिण-पूर्वी क्षेत्रमा बिहीबार राति ५.६ म्याग्निच्युडको भूकम्प गएको छ। यो पछिल्ला छ दिनमा तेस्रो भूकम्प हो।
स्थानीय समय अनुसार राति ८:५६ बजे भूकम्पको झटका महसुस भयो। नान्गरहार र कुनार प्रान्तका बासिन्दाहरू डरले आफ्ना आश्रयस्थलबाट बाहिर निस्किएका थिए।
यद्यपि बिहीबार राति आएको भूकम्पमा मानवीय वा सम्पत्तिको आधिकारिक क्षति पुष्टि भइसकेको छैन। तर स्थानीय डाक्टरहरूले बताएअनुसार १७ जना घाइतेलाई क्षेत्रीय अस्पतालमा लगिएको छ।
संयुक्त राष्ट्रसंघको मानवीय मामिला समन्वय कार्यालय (ओसीएचए) अनुसार, गत आइतबारको भूकम्पमा अहिलेसम्म १,३६८ जनाको मृत्यु भइसकेको छ भने २,१८० जना घाइते भएका छन्।
प्राप्त जानकारी अनुसार, बिहीबार राति पाकिस्तानका धेरै क्षेत्रहरूमा पनि भूकम्पको झट्का महसुस गरिएको थियो।