बागडोग्राबाट विभिन्न परियोजनाहरूको भर्चुअल रूपमा गरे उद्घाटन र शिलान्यास

गान्तोक: सिक्किमको राजधानी गान्तोकमा आजको दिन ऐतिहासिक बन्ने अपेक्षा गरिएको थियो। सात वर्षपछि प्रधानमन्त्री नरेन्द्र मोदीको प्रत्यक्ष उपस्थितिमा पाल्जोर स्टेडियममा आयोजना गरिएको भव्य समारोहलाई स्वागत गर्न हजारौं सिक्किमवासी बिहानैदेखि पर्खिरहेका थिए। तर दुर्भाग्यवश, प्रतिकूल मौसमका कारण प्रधानमन्त्री मोदीको गान्तोक भ्रमण अन्तिम समयमा रद्द गर्नुपर्‍यो, जसले उपस्थित आमजनमानसमा गहिरो निराशा फैलायो।
कार्यक्रमको तयारी महिनौंअघिदेखि सुरु गरिएको थियो। सिक्किम राज्य स्थापनाको ५०औं वर्षगाँठ तथा भारतीय प्रजातन्त्रको स्वर्णजयन्ती अवसरमा आयोजना गरिएको उक्त विशेष समारोहमा प्रधानमन्त्रीको सहभागिता अपेक्षित थियो। देशका सर्वोच्च नेताको स्वागतमा स्टेडियम र सिंगो गान्तोक सहर सांस्कृतिक उत्सवमा रंगिएको थियो। विद्यार्थी, कलाकार, स्वयं सहायता समूहका सदस्य, राजनीतिक नेताहरू लगायत हजारौं मानिस आफ्नो पारम्परिक वेशभूषामा सजिएर बिहानैदेखि स्टेडियममा उपस्थित थिए।
प्रधानमन्त्री मोदी बिहानै नयाँ दिल्लीबाट उडान भरेर बागडोग्रा विमानस्थलमा निर्धारित समयमा अवतरण गरे तापनि, गान्तोकको मौसमले उनलाई अनुमति दिएन। आकाशमा बाक्लो बादलले हवाई उडानलाई असम्भव बनाइदियो। मौसम पूर्वानुमानअनुसार सम्भावना रहेको वर्षाको कारण सुरक्षा दृष्टिले प्रधानमन्त्रीको भ्रमण स्थगन गरिएको आधिकारिक जानकारी दिइयो।
समारोहको केन्द्रमा रहेका विद्यार्थीहरूले पछिल्ला केही सातादेखि दिनरात मेहनत गरेर अभ्यास गरेका सांस्कृतिक कार्यक्रम प्रस्तुत गर्ने अवसर गुमाएका थिए। मञ्चमा राज्यपाल ओमप्रकाश माथुर, मुख्यमन्त्री प्रेमसिंह तामाङ, लोकसभा सांसद इन्द्र हाङ सुब्बा र राज्यसभा सांसद डीटी लेप्चा उपस्थित थिए। प्रधानमन्त्रीको आगमन रद्द भएको औपचारिक घोषणापछि स्टेडियमभरि एक प्रकारको मौनता छायो।
यद्यपि प्रधानमन्त्रीको शारीरिक उपस्थिति सम्भव नभए पनि उनले पश्चिम बङ्गालको बागडोग्राबाट भिडियो कन्फरेन्समार्फत सिक्किमवासीलाई सम्बोधन गरे। सम्बोधनमा प्रधानमन्त्रीले सिक्किमको सीमासम्म पुगेर पनि भित्र पस्न नपाएकोमा खेद प्रकट गर्दै चाँडै पुनः भ्रमण गर्ने वचन दिए। उनले भने, “सिक्किमका लागि मेरो माया विशेष छ। राज्यले गरेको प्रगति प्रसंशनीय छ र म तपाईंहरूसँग प्रत्यक्ष भेट्ने अवसर पुनः खोज्नेछु।”
भर्चुअल कार्यक्रममार्फत प्रधानमन्त्रीले राज्यका विभिन्न महत्वपूर्ण पूर्वाधार परियोजनाहरूको उद्घाटन र शिलान्यास गरे। उद्घाटन गरिएका परियोजनाहरूमा नाम्चीको ५० शैय्याको आधुनिक अस्पताल, पेलिङको साङ्गछोलिङ यात्रुवाहक रोप-वे, गान्तोकको स्वर्णजयन्ती मैत्री मञ्जरी, र साङ्ग खोलाको अमृत उद्यानमा भारत रत्न स्व. अटल बिहारी वाजपेयीको प्रतिमा प्रमुख थिए।
त्यस्तै, शिलान्यास गरिएका परियोजनाहरूमा नाम्लीको स्वर्णजयन्ती कन्भेन्सन सेन्टर, गान्तोकको स्वर्णजयन्ती स्पोर्ट्स एण्ड कल्चरल कम्प्लेक्स, नाम्चीको भाले ढुङ्गामा निर्माण हुन लागेको स्काइवाक, गेजिङको सिङसोरमा ग्लास स्काइवाक ब्रीज, तादोङमा वर्किङ वुमन्स होस्टेल र पाकिममा १०० शैय्याको अस्पताल पनि सामेल छन्। प्रधानमन्त्रीका अनुसार, यी सबै योजनाहरू सिक्किमको दिगो विकास र समृद्धिको नयाँ अध्यायको सुरुवात हुन्।
प्रधानमन्त्रीको प्रत्यक्ष उपस्थिति बिना पनि, सिक्किमका विद्यालय तथा सांस्कृतिक समूहका सयौं विद्यार्थीहरूले आकर्षक प्रस्तुति दिँदै उत्सवको माहोल कायम राखे।

राज्य सरकारले कार्यक्रमलाई सफल बनाउन गरेको लगानी र मेहनतका बाबजुद मौसम बाधक बनेकोमा मुख्यमन्त्री तामाङले खेद व्यक्त गरे। उनले भने, “हामीले कल्पना गरेका सपनाहरू आज अधुरा भए, तर प्रधानमन्त्रीज्यूको सकारात्मक आश्वासनले हामीलाई आगामी दिनका लागि आशावादी बनाएको छ।”
समारोह सम्पन्न भए तापनि आजको दिन सिक्किमका लागि भावनात्मक रह्यो-जहाँ एकातिर विकासको नयाँ संकेतहरू उद्घाटन भए, अर्कोतिर हजारौंको आशा र मेहनत मौसमले ओभाएको अनुभूति भयो।