दार्जिलिङ: आगामी २ अप्रेलको दिन दिल्लीमा त्रिपक्षीय वार्ता हुने दार्जिलिङका‌ सांसद राजु विष्टले बताएका छन्। उनले त्रिपक्षीय वार्ता विषयमा भने, ‘आज हामीले गृह मन्त्रालयबाट केन्द्र सरकार, दार्जिलिङ पहाड, तराई र डुवर्स क्षेत्रका सबै सरोकारवालाहरू र पश्चिम बंगाल सरकारलाई समावेश गर्ने दोस्रो चरणको त्रिपक्षीय वार्तामा भाग लिन निमन्त्रणा प्राप्त गरेका छौं। वार्ता २ अप्रेल, २०२५ मा बिहान ११ बजे नयाँ दिल्लीको नर्थ ब्लकमा हुनेछ र यसको अध्यक्षता भारत सरकारका गृह राज्यमन्त्री (उत्तर) ले गर्नेछन्। केन्द्र सरकार सबै सरोकारवालाहरूको चासोलाई ध्यानमा राख्दै शान्तिपूर्ण संवाद र समग्र दृष्टिकोणबाट हाम्रो क्षेत्रका जनताको लामो समयदेखिको मागहरू समाधान गर्न प्रतिबद्ध छ।’
सांसद राजु विष्टले प्रेस विज्ञप्ति जारी गरी बताएका छन् -‘माननीय प्रधानमन्त्री श्री नरेन्द्र मोदीजी र माननीय गृहमन्त्री श्री अमित शाह जीको नेतृत्वमा, धेरै ऐतिहासिक विवादास्पद मुद्दाहरूलाई सम्बोधन गरिएको छ र सौहार्दपूर्ण रूपमा समाधान गरिएको छ। मलाई विश्वास छ कि यो बैठक अत्यधिक फलदायी हुनेछ र हाम्रो क्षेत्रको लागि खुशीको खबर ल्याउनेछ।
दार्जिलिङ पहाड, तराई र डुवर्सका जनतालाई न्याय सुनिश्चित गर्ने प्रतिबद्धताको लागि हामी प्रधानमन्त्री मोदी जी र गृहमन्त्री अमित शाह जीप्रति धेरै आभारी छौं।’