नयाँ दिल्ली: दक्षिण अफ्रिकाका विकेटकीपर ब्याटर हेनरिक क्लासेनले सनराइजर्स हैदराबादको तर्फबाट खेल्दै आइतवार इण्डियन प्रीमियर लीग (आईपीएल)-मा आफ्नो १००० रन पूरा गर्नको साथै एउटा उल्लेखनीय उपलब्धि हासिल गरे। उनी यस आँकड़ासम्म पुग्ने आईपीएलको इतिहासमा दोस्रो सबैभन्दा तेज खेलाड़ी हुन्। क्लासेनले केवल ५९४ बलको सामना गरी आईपीएलमा १००० रन पूरा गरे। उनी केवल कलकत्ता नाइट राइडर्सका आन्द्रे रसेलभन्दा पछि रहेका छन्, जसले ५४५ बलमा आफ्नो १००० आईपीएल रन पूरा गरेका थिए। यस सूचीमा उनले वीरेन्द्र सहवाग, ग्लेन म्याक्सवेल र यूसुफ पठान जस्ता दिग्गज खेलाड़ीहरूलाई पछि छोड़े। सहवागले ६०४ बलमा अनि ग्लेन म्याक्सवेलले ६१० बलमा यस उपलब्धिलाई हासिल गरेका थिए। यसरी यूसुफले ६१७ अनि सुनिल नारेनले पनि त्यति नै बलमा १००० आईपीएल रन पूरा गरेका थिए। क्लासेनले आईपीएलमा २८ वटा म्याच खेलेर ४४.१४-को औसत र १७३.९२-को स्ट्राईक रेटले १००० रन पूरा गरे। आइतवार राजस्थान रोयल्सविरुद्ध म्याचमा क्लासेनलाई १००० रन पूरा गर्न केवल ७ रनको आवश्यकता थियो अनि उनले म्याचमा ५ वटा चौका र एउटा छक्काको साथ १४ बल खेलेर ३४ रन बनाए।