गान्तोक: नाम्ची जिल्लाअन्तर्गत सञ्चालित कामराङ माध्यमिक विद्यालयले आज स्वर्ण जयन्ती समारोह भव्यरूपमा पालन गऱ्यो। कामराङ माध्यमिक विद्यालयको स्थापना भएको ५०औं वर्षागाँठ विभिन्न कार्यक्रम सहित पालन गरिएको हो। यस कार्यक्रममा राज्यका शहरी विकास विभागीय मन्त्री भोजराज राई मुख्य अतिथिकारूपमा उपस्थित थिए। साथमा नाम्ची खण्ड विकास अधिकारी उपेन्द्र राई, शिक्षा विभागका अधिकारी सुरज राई लगायत अन्य अधिकारीहरू सामेल रहेका थिए। कार्यक्रमलाई सम्बोधन गर्दै मन्त्री राईले विद्यालयको स्वर्ण जयन्तीको निम्ति विद्यालयका सम्पूर्ण शिक्षकवर्ग, विद्यार्थी लगायत विद्यालयका सबै कर्मचारीहरूलाई बधाई साथै शुभकामना दिए। मन्त्री राईले यस विद्यालयले धेरै वर्षदेखि सफलता हासिल गर्दै आइरहेको र यसलाई साकाररूपमा दिनको निम्ति गरेको भूमिकाबारे प्रशंसा गरे। मन्त्री राईले विद्यालयले स्थानीय मानिसहरूसँग कसरी सम्बन्ध बनाउने सो भावनालाई बढावा दिएको जानकारी गराए। उनले समाजलाई आकार दिन शिक्षाको महत्वपूर्ण भूमिकामाथि बोल्दै अभिभावकहरूलाई आगामी पुस्ताको उज्ज्वल भविष्य सुनिश्चित गर्न आफ्नो बालबालिकाहरूलाई विद्यालयमा भर्ना गराउन प्रोत्साहित गरे। सोही क्रममा विद्यालयकी प्रधान अध्यापिका प्रिया लामाले संस्थाले अहिलेसम्म गरेको उल्लेखनीय भूमिकाबारेमा जानकारी गराइन्। उनले विगत पचास वर्षमा समुदायमा विद्यालयको अतुलनीय योगदान र क्षेत्रीय विकासमा यसको महत्त्वपूर्ण प्रभावबारे अवगत गराइन्। यसका साथै उनले संस्थाको सफलतामा अभिन्न भूमिका खेल्ने विद्यालयका कर्मचारी सदस्यहरूको प्रतिबद्धता र समर्पणको प्रशंसा गरिन्। उनले कामराङ माध्यमिक विद्यालयलाई शैक्षिक उत्कृष्टताको अग्रपंक्तिमा पुर्याोउने अनुकूल सिकाइ वातावरणलाई बढावा दिन उनीहरूको अटुट प्रयासको लागि कृतज्ञता व्यक्त गरिन्।