बर्दवान: पूर्व भारतीय क्रिकेटर र “कलकत्ताका राजकुमार” सौरभ गांगुली बर्दवान विश्वविद्यालयको अडिटोरियम हलमा विशेष वक्ताको रूपमा देखा परे। कार्यक्रममा विश्वविद्यालयका उपकुलपति शंकरकुमार नाथ लगायतका विशिष्ट व्यक्तिहरुको उपस्थिति रहेको थियो।
कार्यक्रममा सौरभ गांगुलीले विद्यार्थीका विभिन्न प्रश्नको जवाफ दिए। उनले आफ्नो क्रिकेट करियरको उतारचढाव, आफ्नो सफलताको पछाडिको कडा परिश्रम र पारिवारिक जीवनका अनुभवहरू खुलेर साटा – साट गरे। उनले भने, “मेहनतको विकल्प छैन, भाग्यको कुरा भए पनि मिहिनेतले मात्रै उपलब्धि हुन्छ।”
एक प्रश्नको जवाफमा सौरभले आफ्नो जीवन कहिल्यै सहज नभएको बताए। भारतीय टोलीमा मौका पाएदेखि कप्तान बन्नेसम्म उनले सधैं राम्रो प्रदर्शन गर्नुपर्‍यो र ठूलो दबाबको पनि सामना गर्नु पर्‍यो।
सञ्चालक तुलिकाको प्रश्नको जवाफ दिँदै सौरभले भने, “सफल हुनको लागि आफ्नो पेशाप्रतिको माया र प्रतिबद्धता हुनुपर्छ, आलोचना पनि हुन्छ तर अन्त्यमा कडा परिश्रमले फल दिन्छ।”
एक विद्यार्थीले सोधे, बाल्यकालमा के मन पर्थ्यो? “मेरो ब्याट र बल मेरो मनपर्ने साथीहरू थिए,” सौरभले मुस्कुराउँदै भने।
सो कार्यक्रममा विश्वविद्यालयका अधिकारीहरूले सौरभ गांगुलीलाई सम्मान गर्दै विशेष तस्विर प्रदान गरेका थिए। यस कार्यक्रममा पूर्वी बर्दवान जिल्ला मजिस्ट्रेट आयशा रानी र पुलिस अधीक्षक सायक दास उपस्थित थिए।

अन्त्यमा सौरभले विद्यार्थीलाई भने, ‘कुनै पनि काम मायाले गर्ने हो भने सफलता अवश्य मिल्छ। कार्यक्रममा विश्वविद्यालयका शिक्षकहरुको समेत उपस्थिति रहेको थियो भने विद्यार्थीहरुको उत्साह पनि देखिएको थियो।