कोलकाता: भारतको दोस्रो ठूलो पेन्ट्स तथा कोटिंग्स कम्पनी, बर्जर पेन्ट्स इण्डिया लिमिटेडले आफ्नो १००औं वर्षगाँठ मनाएको छ। यस अवसरमा कम्पनीले आफ्नो मुख्यालय कोलकाताको न्यू टाउनमा स्थानान्तरण गरेको छ। पश्चिम बङ्गाल  सरकारकी मन्त्री डा शशि पांजाले नयाँ कार्यालयको उद्घाटन गरिन्। नयाँ मुख्यालय आठतले भवनमा अवस्थित छ, जुन १,९०,००० वर्गफुटमा फैलिएको छ। यसको डिजाइन पेंटको डिब्बा जस्तो आकर्षक छ। बर्जर पेन्ट्सका सीईओ अभिजीत रॉयले कम्पनीको बङ्गालसँगको गहिरो सम्बन्धको चर्चा गर्दै भने, “१९२३ मा हावडाबाट शुरु भएको यो कम्पनी आज भारतकै दोस्रो ठूलो पेन्ट कम्पनी बनेको छ।”

बङ्गालमा कम्पनीका तीन प्रमुख उत्पादन इकाइहरू छन्। बर्जर पेन्ट्सले विभिन्न प्रतिष्ठित परियोजनाहरूमा योगदान दिएको छ, जसमध्ये भारतको संसद, वन्दे भारत ट्रेन, कोलकाता मेट्रो, र वानखेड़े स्टेडियम प्रमुख छन्। कम्पनी दक्षिण र पश्चिम भारतमा आफ्नो बजार विस्तार गर्न चाहन्छ। नयाँ मुख्यालय ‘विबग्योर’ थीममा डिजाइन गरिएको छ, जसमा प्रत्येक तलालाई फरक रङले प्रस्तुत गरिएको छ। कार्यालयमा आधुनिक आर्ट ग्यालरी, ‘माई कलर एप’ सेवा, र हरित उर्जाका लागि सौर्य प्रविधिको प्रयोग गरिएको छ। यसले ‘एलईईडी’ प्लाटिनम ग्रीन बिल्डिंग प्रमाणपत्र पनि प्राप्त गरेको छ। बर्जर पेन्ट्सले १०० वर्षको यात्रामा १०० करोडबाट १२,००० करोड रुपियाँको बहुराष्ट्रिय कम्पनीमा रूपान्तरण भइसकेको छ। २०२३-२४  मा कम्पनीको वार्षिक आम्दानी ११,१९९ करोड रुपियाँ पुगेको छ, र २०३० सम्म २०,००० करोड रुपियाँको लक्ष्य राखिएको छ। पश्चिम बङ्गालको पानागढमा नयाँ उत्पादन इकाइ खोल्ने योजना छ, जसले रोजगारीका अवसरहरू बढाउने अपेक्षा गरिएको छ। कम्पनी ग्राहकहरूको आवश्यकताअनुसार नवीनतम प्रविधियुक्त उत्पादनहरू बजारमा ल्याउने प्रयासमा छ। यसअन्तर्गत ‘कलर ब्यांक’, ‘वेदरकोट एन्टी डस्ट’, ‘एक्सप्रेस पेंटिंग’ तथा ‘ईजी क्लीन’ जस्ता अत्याधुनिक उत्पादनहरू सामेल छन्। बर्जर पेन्ट्सले नवाचार र गुणस्तरका माध्यमबाट आफ्नो बजारलाई अझ मजबुत बनाउने लक्ष्य राखेको छ।