निर्यात क्लिनिकको उद्घाटन र ‘पश्चिम बङ्गालका एमएसएमईहरूको निर्यात सम्भावना अनलक गर्ने रणनीति’ सम्बन्धी प्रतिवेदनको अनावरण कार्यक्रममा प्याटन इण्डियाका एमडी सञ्जय बुधियाले प्रस्तुत गरेको सम्भाषण यहाँ प्रस्तुत छः     

‘‘मित्रहरू, हामी सबैलाई थाहा छ, हालका वर्षहरूमा भारत विश्वव्यापी निर्यात क्षेत्रमा एक शक्तिशाली राष्ट्रको रूपमा उभिएको छ र व्यापार प्रदर्शनको हिसाबले उल्लेखनीय प्रगति हासिल गरेको छ। भारतको निर्यात क्षेत्र आर्थिक प्रगतिको प्रतीक बनेको छ र अहिले विश्वका प्रमुख अर्थतन्त्रहरूका लागि प्राथमिक व्यापार साझेदारको रूपमा उभिएको छ। हाम्रो राज्य पश्चिम बङ्गाल यस क्षेत्रमा अग्रसर रहँदै आएको छ र ‘व्यवसाय गर्न सजिलो’ (इज अफ् डुइङ्   बिजिनेस) को दिशामा सरकारले लिएको पहल, प्रणालीमा पारदर्शिता र ई-शासनद्वारा प्रवर्द्धित सुधारका कारण देशकै तीव्र गतिमा विकास भइरहेको राज्यहरूमध्ये एक बनेको छ।

पश्चिम बङ्गाल भारतको चौथो ठूलो राज्य हो, जसको कुल राज्य घरेलु उत्पादन (जीएसडीपी) १८.८ लाख करोड रुपैयाँ रहेको छ र वार्षिक निर्यात १ लाख करोड रुपियाँभन्दा बढी छ। हाम्रो सरकारले आगामी दशकमा निर्यात दोब्बर बनाउने लक्ष्य राखेको छ र यस लक्ष्यलाई पार गर्न उद्योग क्षेत्र र सरकारबीच सहकार्य हुने वातावरण सिर्जना गर्न आवश्यक सबै कदम चालिरहेको छ। हाम्रो सम्माननीय मुख्यमन्त्रीज्यूले गत वर्ष नयाँ निर्यात नीति र लजिस्टिक्स नीति सार्वजनिक गर्नुभएको थियो, जुन सम्बन्धित सरोकारवालासँग विस्तृत र गहन परामर्शपछि तयार पारिएको हो। माननीय मुख्यमन्त्रीको सक्रिय स्थलमै निर्णय र समाधानहरू तथा उनको टोलीद्वारा परियोजनाहरूको समीक्षा र अनुगमन गर्ने कार्य उत्साहजनक, प्रेरणादायी रहेको छ। यसले पश्चिम बङ्गालको औद्योगीकरणप्रति प्रतिबद्धता, अनुकूल प्रतिक्रिया, र शीघ्र कार्यान्वयनलाई पुनः पुष्टि गर्दै विद्यमान र सम्भावित लगानीकर्ताहरूबीच विश्वास र आत्मविश्वासलाई मजबुत बनाउँछ।

हामी स्वयं प्याटन समूहका रूपमा राज्यभर ८ वटा कारखाना सञ्चालन गरिरहेका छौं, जहाँ ३८०० भन्दा बढी मानिसहरू कार्यरत छन्, र कुनै पनि हड्ताल वा लकआउटका कारण एक दिन पनि काम रोकिएको छैन। हामीले पछिल्ला दुई दशकदेखि अमेरिका जस्ता उच्च गुणस्तर र समय-सम्बन्धी सचेत बजारमा निर्यात गरिरहेका छौं। यस राज्य पश्चिम बङ्गालबाट कुनै अवरोध बिना नै विश्वका ठूला कम्पनीहरूलाई सफलतापूर्वक निर्यात गरिरहेका छौं। पश्चिम बङ्गालमा प्राकृतिक स्रोतसाधनहरूको प्रचुरता, उत्कृष्ट रणनीतिक स्थान, दक्ष, प्रतिभाशाली र युवा श्रमिक उपलब्धता, प्रतिस्पर्धात्मक उत्पादन क्षमताहरू, तथा संस्थागत समर्थन उपलब्ध छ। हालको भू-राजनीतिक तथा विश्व व्यापार सन्दर्भले पश्चिम बङ्गाललाई अर्को विश्वव्यापी प्रत्यक्ष वैदेशिक लगानी (एफडीआई) गन्तव्यको रूपमा उदाउन उत्तम अवसर प्रदान गरेको छ। राज्यमा रहेको समृद्ध स्रोतसाधन तथा बन्दरगाहहरूले विश्वव्यापी आपूर्ति श्रृंखलालाई फाइदा पुर्याउने तथा यसलाई अर्को वैश्विक उत्पादन केन्द्रको रूपमा विकास गराउने महत्वपूर्ण भूमिका खेल्नसक्छ।

हामी सबैले व्यापार प्रवर्धनका लागि सरकारद्वारा गरिएको विभिन्न कार्यहरूबारे सुनेका छौं, जस्तै निर्यात क्लिनिकको उद्घाटन, जसले व्यवसायहरूलाई अन्तर्राष्ट्रिय व्यापारमा फस्टाउन आवश्यक मार्गदर्शन तथा स्रोतहरू उपलब्ध गराउन सरकारको प्रतिबद्धतालाई अझ मजबुत बनाउँछ। खाद्य प्रशोधन विभागबीच हस्ताक्षर भएको समझदारीपत्र यस क्षेत्रलाई बलियो बनाउने तथा यसको विश्वव्यापी पहुँच बढाउने महत्त्वपूर्ण कदम हो।

डब्ल्युबीआईडीसीले ११ वटा जिल्लाको विस्तृत अध्ययन गरी विश्व बजारमा प्रवर्द्धन गर्न सकिने उत्पादनहरू पहिचान गरेको छ। समावेशी वृद्धिको लक्ष्य हासिल गर्न विस्तृत रोडम्याप तयार पारिएको छ र जिल्ला प्रशासनसँग सम्झौताहरू हस्ताक्षर गरिएको छ। एमएसएमई  विभागले ज्ञान साझेदार दुन एण्ड ब्रेडस्ट्रीटसँग मिलेर “पश्चिम बङ्गालका एमएसएमई  हरूको निर्यात क्षमता अनलक गर्ने रणनीति” विषयक प्रतिवेदन तयार गरेको छ। यस प्रतिवेदनले विद्यमान शक्तिहरूमा ध्यान केन्द्रित गरी सुसंगठित रोडम्याप प्रस्तुत गर्दै बङ्गालको निर्यात सम्भावना उजागर गर्ने सिफारिसहरू गरेको छ। पश्चिम बङ्गाल सरकारले लक्ष्यगत क्षेत्रहरूबाट निर्यात वृद्धि गर्ने उद्देश्य राखेको छ, जसका लागि बजार पहुँच विस्तार र नयाँ उत्पादनहरूको खोजीमा जोड दिइएको छ। निर्यात प्रक्रियालाई सरल बनाउने, निर्यात पूर्वाधार जस्तै आईसीडीहरू, साझा सुविधा केन्द्रहरू, र कोल्ड स्टोरेजहरू सुदृढ गर्नेलगायत विभिन्न पहलहरू कार्यान्वयन गरिँदैछ। साथै, राज्यमा उपलब्ध ठूलो संख्यामा दक्ष जनशक्तिको उपयोग गर्दै सेवा क्षेत्रबाट निर्यात प्रवर्द्धन र प्रोत्साहनका लागि समेत सरकारले विभिन्न योजनाहरू अघि सारेको छ।

सीआईआई भारतको अन्तर्राष्ट्रिय व्यापारलाई प्रवर्द्धन गर्न निरन्तर प्रतिबद्ध छ। यसले निर्यात प्रक्रियालाई सरल बनाउन, बजार पहुँच विस्तार गर्न, र दिगो व्यापार अभ्यासहरूलाई प्रवर्द्धन गर्न नीति निर्माणका लागि निरन्तर पैरवी गरिरहेको छ। उद्योग क्षेत्रका साझेदारहरू, सरकारी निकायहरू, र अन्तर्राष्ट्रिय साझेदारहरूसँगको सक्रिय संलग्नताको माध्यमबाट सीआईआईले भारतको विश्वव्यापी उपस्थिति बढाउन तथा बङ्गालको रणनीतिक अवस्थिति, निर्यात क्षमता, र पूर्वाधारलाई उपयोग गर्दै दीर्घकालीन आर्थिक वृद्धिलाई सशक्त पार्ने कार्य गर्दै आइरहेको छ। विशाल अवसरहरू अगाडि रहेका कारण, बङ्गाल अन्तर्राष्ट्रिय व्यापारको एक गतिशील चरणतर्फ अग्रसर हुँदैछ। आजको छलफलले निर्यातका लागि नयाँ मार्गहरू खोल्ने, विश्वव्यापी व्यापार साझेदारीहरू सुदृढ गर्ने, र राज्यको प्रतिस्पर्धात्मक क्षमतालाई अझ मजबुत बनाउनेछ। म आशा गर्दछु कि यी विचारशील र अन्तरदृष्टिपूर्ण छलफलहरूले अझ सशक्त र समृद्ध व्यापार प्रणालीको निर्माणमा योगदान पुर्याउनेछन्।”