जलपाईगढी: आइतबार जलपाईगढी जिल्लाको सदर ब्लकमा रहेको भारत-बङ्गलादेश सीमावर्ती गाउँ गोरलबारी लगायत अन्य ठाउँहरूमा गणतन्त्र दिवस पूर्ण सम्मानका साथ मनाइयो। स्थानीय स्वयंसेवी संस्था जनसङ्गठनको पहलमा गाउँका बालबालिकाहरूले राष्ट्रिय झण्डा फहराएर गणतन्त्र दिवस समारोहको शुरुवात भयो।

७६औं गणतन्त्र दिवसको अवसरमा गाउँका बालबालिकाहरूका लागि चित्रकला प्रतियोगिता आयोजना गरिएको थियो। यस चित्रकला प्रतियोगितामा सीमावर्ती गाउँका करिब सय बालबालिकाले भाग लिएको आयोजकले बताएको छ। सीमावर्ती गाउँमा आयोजित यस गणतन्त्र दिवस समारोहको एउटा उल्लेखनीय विशेषता के थियो भने चित्रकला प्रतियोगितामा भाग लिने प्रत्येक बालबालिकालाई एउटा बिरुवा दिइयो। प्रतियोगिताको अन्त्यमा, गाउँका बूढापाका र सार्वजनिक संस्थाका सदस्यहरूले सफल सहभागीहरूलाई पुरस्कार र बिरुवा प्रदान गरे।