प्रयागराज महाकुम्भ २०२५ धेरै दृष्टिकोणले विशेष हुँदैछ। महाकुम्भमा पहिलो पटक विश्व हिन्दू परिषदको आयोजनामा १० फरवरीदेखि तीन दिवसीय बौद्ध सम्मेलन आयोजना गर्न लागिएको छ। यस सम्मेलनमा भारतसहित विश्वका विभिन्न देशका बौद्ध भिक्षुहरू र लामा ठूलो संख्यामा सहभागी हुनेछन्। विश्व हिन्दू परिषदका अन्तर्राष्ट्रिय संगठन महामन्त्री मिलिन्द परांडेले बताएअनुसार, कुम्भ आध्यात्मिक एकताको स्थल हो। शैव, जैन, सिख, बौद्धजस्ता परम्पराहरूको जन्म यसै पुण्यभूमिमा भएको हो। विभिन्न परम्पराका सन्तहरूबीच आपसी भेटघाट सामान्य प्रक्रिया हो। संघर्षका कालखण्डमा यी वार्तालापहरू रोकिएका थिए। विगतमा पनि विहिपका सम्मेलनहरूमा बौद्ध धर्मगुरु पूज्य दलाई लामाले सहभागिता जनाएका थिए। यस पटक पनि उनका प्रतिनिधिहरू सन्देशसहित आउनेछन्। मिलिन्द परांडेले थप जानकारी दिँदै भने, ‘बौद्ध सम्मेलनमा विभिन्न बौद्ध परम्पराका भिक्षुहरू भारतबाहेक रूस, अमेरिका, जर्मनी, इटली, कोरिया, थाइल्याण्ड, म्यान्मार, तिब्बत, नेपाल र श्रीलङ्कालगायत थुप्रै देशका सहभागी हुनेछन्।‘
विश्व हिन्दू परिषद आफ्नो स्थापना कालदेखि हिन्दू सम्मेलनहरूको आयोजना गर्दै आएको छ। सन् १९६६ मा प्रयागराजको कुम्भ मेलाको अवसरमा पहिलो विश्व हिन्दू सम्मेलन आयोजना गरिएको थियो। यस सम्मेलनमा राष्ट्रिय स्वयं सेवक संघका तत्कालीन सरसंघचालक श्री गुरुजीका अथक प्रयासका कारण चारै शंकराचार्यसहित हिन्दू समाजका विभिन्न सम्प्रदायका धर्मगुरु, साधु-सन्तहरू एकै मञ्चमा आएका थिए। यस सम्मेलनमा विश्वका धेरै देशका प्रतिनिधिहरूले पनि भाग लिएका थिए। त्यसपछि प्रयागमा जब जब कुम्भ र अर्धकुम्भको आयोजना भयो, विहिपले हिन्दू सम्मेलनहरूको आयोजना गरिरह्यो। यद्यपि हिन्दू सम्मेलनहरूमा बौद्ध भिक्षुहरू पनि सहभागी भइरहेका थिए। तर, यस पटकको महाकुम्भमा पहिलो पटक छुट्टै बौद्ध सम्मेलन आयोजना हुन लागेको हो।