गान्तोक: सिक्किमका मुख्यमन्त्री प्रेमसिंह तमाङले राज्यका विशिष्ट चुनौती र आकांक्षाहरूलाई सम्बोधन गर्न वित्तीय सहायता माग्दै, १६औं वित्त आयोगका अध्यक्ष अरविन्द पनगढियाको नेतृत्वमा रहेको टोलीसँग भेट गरेका छन्। राज्य सचिवालयमा आयोजित बैठकमा सिक्किमको उपलब्धि र दिगो विकास सुनिश्चित गर्नका लागि विशिष्ट वित्तीय सहयोगको आवश्यकतामा ध्यान केन्द्रित गरियो। मुख्यमन्त्री तमाङले सामाजिक सञ्जालमार्फत् सेयर गरेको विवरणअनुसार, उनले सिक्किमको उल्लेखनीय प्रगतिबारे प्रकाश पार्दै, प्रतिव्यक्ति आम्दानीको उच्च दर, आर्थिक विकास र जैव विविधता संरक्षण तथा जलवायु परिवर्तन न्यूनीकरणमा राज्यको विश्वव्यापी भूमिकालाई उजागर गरे। मुख्यमन्त्रीले राज्यका चुनौतीहरू पनि उजागर गरे, जस्तै कमजोर सडक सञ्जाल। विशेषगरी एनएच-१०, जुन भारतसँग जोड्ने एकमात्र सडक मार्ग हो, मनसुनको समयमा बारम्बार अवरोधमा पर्नु सिक्किमका लागि मुख्य समस्या हो। यसका साथै, ७०९ किलोमिटर मात्र रहेको राष्ट्रिय राजमार्ग, रेलवे, विमानस्थल र डिजिटल कनेक्टिभिटीजस्ता पूर्वाधार परियोजनाहरूमा भएको ढिलाइमाथि पनि उनले जोड दिए। मुख्यमन्त्रीले सिक्किमलाई भारतको पहिलो पूर्ण जैविक खेती भएको राज्यको रूपमा हरित अर्थतन्त्रप्रति राज्यको प्रतिबद्धताको कारण राजस्व घाटाका लागि वित्तीय क्षतिपूर्ति माग गरे। उनले जैविक उत्पादनहरूमा पारदर्शिता र ट्रेसबिलिटी बढाउन क्युआर कोड जस्ता पहलको प्रस्ताव गरेका छन्। मुख्यमन्त्री तमाङले भने, ‘यी पहलहरूले सिक्किमलाई दिगो नीति र लगानीसहित देशको पहिलो हरित राजधानी बनाउन सहयोग पुर्‍याउनेछ।‘