सिलगढी: इस्लामपुर अदालतबाट रायगञ्ज सुधार केन्द्र लैजाँदै गर्दा पुलिसमाथि एक अपराधीले गोली हानेको थियो।यस घटनापछि प्रशासनले सुरक्षा व्यवस्थामा फेरबदल गरेको छ। अदालत परिसरमा सुरक्षा व्यवस्था थप मजबुत बनाउनुका साथै अपराधीलाई अदालतमा हाजिर गर्ने तरिकामा पनि परिवर्तन गर्ने योजना बनाइएको छ। कुख्यात आरोपी सज्जक आलमलाई गत बुधबार उत्तर दिनाजपुरको गोलपोखर अदालतमा लगिएको थियो। सुनुवाइपछि सज्जकलाई अदालतबाट फिर्ता कारागार लगिएको थियो। सोही क्रममा सज्जकले ड्युटीमा रहेका दुई पुलिसलाई अचानक गोली हानेर भागेका थिए। त्यसपछि अदालत परिसरमा बन्दुक कहाँबाट आयो भन्ने प्रश्न उठ्न थालेको छ। यस घटनापछि राज्यका डीजी राजीव कुमारले सबै जिल्ला पुलिस र पुलिस आयुक्तालयका अधिकारीहरूलाई कडा सुरक्षा निर्देशन दिएका छन्। यस अन्तर्गत सिलगढी महानगरीय पुलिसका डीसीपी तन्मय सरकारले सिलगढी विभागीय अदालत परिसरको निरीक्षण गरे। उनले सुरक्षा व्यवस्था, कैदीको मर्मतसम्भार र अदालतमा उपस्थित पुलिसको संख्याको समीक्षा गरेका थिए। स्रोतका अनुसार अहिले पुराना कैदीहरूलाई अदालतमा पेश गर्न अनलाइन माध्यम प्रयोग गर्ने विषयमा छलफल भइरहेको छ।
वरिष्ठ पुलिस अधिकारीहरूले यस विषयमा न्यायाधीशहरूसँग छलफल गर्न थालेका छन्। गोलीकाण्डपछि सिलगढी अदालतमा कैदीहरू हाजिर हुन प्रतिबन्ध लगाइएको छ। सुरक्षाको कारणले गर्दा अदालत र कारागार प्रशासन मिलेर अब अनलाइन सुनुवाइका लागि बृहत् योजना तयार गर्दैछन्। भविष्यमा यस्ता घटना हुन नदिन यो कदम चालिएको हो।