सिलगढ़ी: सालबारीस्थित प्रकाशन संस्था बुकआण्टले आफ्नो नयाँ परम्परागत प्रकाशन एकाई स्यालामेण्डर इम्प्रिण्ट्सको थालनी गर्ने घोषणा गरेको छ। यस नयाँ शाखाले उच्चस्तरीय गैर-आख्यान (नन-फिक्सन) पुस्तकहरू, जस्तै शैक्षिक र गैर-शैक्षिक अनुसन्धान, क्षेत्रीय इतिहासका साथै चुनिएका आख्यान (फिक्सन) र कविता कृति पनि प्रकाशन गर्नेछ। मुख्य रूपमा सेल्फ-पब्लिशिङका लागि परिचित बुकआण्टका लागि यो महत्त्वपूर्ण कदम हो। कम्पनीका निर्देशक राजा पुनियानीले भने, “हामीले २०२२ मा स्थापना भएदेखि नै परम्परागत प्रकाशनमा हात हाल्ने सपना देखिरहेका थियौँ। स्यालामेण्डर इम्प्रिण्ट्सको माध्यमबाट हामी हाम्रो क्षेत्रका साहित्यिक कृतिहरूलाई राष्ट्रिय पहिचान दिने प्रयास गर्नेछौं र ती आवाजहरूलाई मुख्यधारामा ल्याउनेछौँ, जो अहिले पनि सुनिनका लागि संघर्षरत छन्।”

पहिलो परियोजना: पल्लविब राईको ‘लाटी’:

बुकआण्टले लोकप्रिय पोएट आइडल फाइनलिस्ट तथा प्रसिद्ध फिल्म निर्माता पल्लविब राईसँग उनको पहिलो नेपाली कविता संग्रह ‘लाटी’ प्रकाशनका लागि सम्झौता गरेको छ। यो सम्झौता द कर्डको कार्यालयमा सम्पन्न भएको थियो। यस कार्यक्रममा विशेष उपस्थितिमा डाक्टर सत्यदीप छेत्री, ‘गोर्खाल्यान्ड डायरीज़’-का लेखक; नरेश के. शाही, बुकआण्टका सल्लाहकार तथा अनुवादक; राहुल सम्भवी सिन्हा, द कर्डका निर्देशक; अनिर तामाङ, लोकप्रिय सामग्री विकासकर्ता तथा गायक (दार्जीलिङे कान्छा) उपस्थित थिए। पल्लविब राईले भने, “स्यालामेण्डर इम्प्रिण्ट्स र तिनका विज्ञ समितिले मेरो कामलाई विश्वास गरी यो प्लेटफर्म उपलब्ध गराएकोमा म शब्दमा व्यक्त गर्न नसकिनेगरी आभारी छु। यो मेरो र स्यालामेण्डर इम्प्रिण्ट्स दुवैका लागि विशेष थालनी हो। यो शाखाले परम्परागत प्रकाशन मोडेल अपनाउनेछ, जसमा प्रकाशनको सम्पूर्ण खर्च प्रकाशकले बेहोर्नेछ र लेखकसँग रोयल्टी साझा गर्नेछ।”

स्यालामेण्डर इम्प्रिण्ट्सअन्तर्गत आगामी योजना :

स्यालामेण्डर इम्प्रिण्ट्सले दुर्लभ र महत्त्वपूर्ण अनुसन्धान-आधारित कृतिहरूलाई अंग्रेजी र नेपाली दुवै भाषामा प्रकाशन गर्ने योजना बनाएको छ। पुनियानीले भने, “हाम्रो क्षेत्रका केही दुर्लभ पुस्तकहरू, जुन अहिले उपलब्ध छैनन्, साथै गहन अनुसन्धान-आधारित कृतिहरू, प्रकाशन प्रक्रियामा छन्।” उनले यो पनि आश्वासन दिए कि स्यालामेण्डर इम्प्रिण्ट्सले बुकआण्टका सेल्फ-पब्लिशिङ प्रयासहरूलाई असर गर्ने छैन र दुवै शाखाहरू पाठकहरूको आवश्यकताअनुसार समानान्तर रूपमा सञ्चालन हुनेछन्।

‘लाटी’ को प्रकाशन मिति:

पल्लविब राईको रोम्यान्टिक कविता संग्रह लाटी भ्यालेन्टाइन्स डे, १४ फरवरी २०२५ का दिन सार्वजनिक गरिनेछ।