उत्तर दिनाजपुर: वर्षको अन्तिम दिन रायगञ्ज  मेडिकल कलेज तथा अस्पताल परिसरबाट एक शंकास्पद युवकलाई पक्राउ गरिएको छ। अस्पतालका कर्मचारीहरूले युवकलाई नियन्त्रणमा लिएर पुलिसलाई जिम्मा दिएका छन्। मंगलबार बिहान रायगञ्ज  मेडिकल कलेज तथा अस्पतालका ड्युटी स्टाफले एक युवकलाई शंकास्पद गतिविधिमा देखेपछि नियन्त्रणमा लिएर पुलिसलाई खबर गरे। उक्त युवकले अस्पतालका विभिन्न स्थानहरूको तस्वीर लिइरहेको थियो, जसले गर्दा कर्मचारीहरूलाई शंका उत्पन्न भयो। युवकलाई सोधपुछ गर्दा उसले बताएअनुसार उनकी आमा अस्पतालमा भर्ना भएकी छन्। उनले भने, ‘अस्पतालको तस्वीर दिल्लीमा आफ्नो ‘सेठ’लाई पठाएपछि उसले आमाको उपचारका लागि पैसा पठाउनेछ।‘

तर, जाँचपश्चात थाहा भयो कि अस्पतालमा युवकको कुनै पनि नातेदार भर्ना छैन। घटनाबारे पुलिसलाई जानकारी गराइयो। पुलिस तत्काल घटनास्थलमा पुगेको थियो र युवकलाई पक्राउ गरी रायगञ्ज  थाना लगियो। युवकको साथबाट थुप्रै नक्कली नोट र एटीएम कार्ड बरामद गरिएको छ। अस्पताल स्रोतका अनुसार, पक्राउ परेका युवकको नाम अंसारुल हक (२५) हो। उनको घर रायगञ्जको रामपुर ग्राम पञ्चायतको गोमोर्धा क्षेत्रमा रहेको छ। अस्पतालका ड्युटीमा खटिएका कर्मचारी एमडी रफिक आलमले भने, “युवकले अस्पतालका विभिन्न स्थानका साथै अधिकारीहरूको समेत तस्वीर लिइरहेको थियो। सोधपुछ गर्दा उनले सुरुमा भने कि उनकी आमा अस्पतालमा भर्ना भएकी छन्।‘ उनले भने, ‘‘अस्पतालको तस्वीर दिल्ली पठाएपछि सेठले पैसा पठाउनेछ। तर, अनुसन्धानपछि थाहा भयो कि उनकी आमा अस्पतालमा भर्ना छैनन्। त्यसपछि उनको साथबाट नक्कली नोट र एटीएम कार्ड बरामद भयो। उनलाई पुलिसलाई जिम्मा लगाइएको छ। पुलिसले यसबारे थप अनुसन्धान गर्नेछ।” यद्यपि, युवकले आफूमाथि लागेका सबै आरोप अस्वीकार गरेका छन्। उनले भनेअनुसार, ‘उनकी आमा अस्पतालमा भर्ना भएकी छन्। सेठलाई तस्वीर पठाएपछि पैसा पाउने बताएका छन्। नक्कली नोट गाउँको मेलाबाट पाएको दाबी गर्दै उनले कुनै पनि आपराधिक उद्देश्य नरहेको बताएका छन्।