नयाँ दिल्ली: भारतका पूर्व प्रधानमन्त्री डा मनमोहन सिंहको ९२ वर्षको उमेरमा बिहीबार निधन भयो। उनी उमेर सम्बन्धी रोगहरूसँग जुधिरहेका थिए। पूर्व प्रधानमन्त्रीको निधनको सम्बन्धमा दिल्लीस्थित अखिल भारतीय आयुर्विज्ञान संस्थान (एम्स) ले एक प्रेस विज्ञप्ति जारी गर्दै भने, ‘हामी अत्यन्त दुःखका साथ भारतका पूर्व प्रधानमन्त्री डा मनमोहन सिंहको ९२ वर्षको उमेरमा निधनको सूचना दिन्छौं। उनी उमेर सम्बन्धी स्वास्थ्य समस्याहरूको उपचार गरिरहेका थिएl २६ दिसम्बर २०२४ को दिन अचानक घरमा बेहोश भए। तुरुन्तै उनलाई बचाउन प्रयास गरिए, तर उनलाई बचाउन सकिएन र राति ९:५१ बजे मृत घोषणा गरियो।‘ पूर्व प्रधानमन्त्रीको निधनमा राष्ट्रपति, उपराष्ट्रपति र प्रधानमन्त्रीसहित देशका धेरै प्रमुख नेताहरू र हस्तीहरूले शोक व्यक्त गरेका छन्। भारत सरकारले आजका लागि निर्धारित सबै कार्यक्रम रद्द गरेको छ, र सात दिनको राष्ट्रिय शोक घोषणा गरेको छ। डा मनमोहन सिंहको अन्तिम संस्कार राजकीय सम्मानका साथ गरिनेछ। उनका अन्तिम संस्कार २८ दिसम्बर शनिबार हुने अपेक्षा गरिएको छ। डा मनमोहन सिंहको जन्म १९३२ मा पंजाबमा भएको थियो। उनी २००४ देखि २०१४ सम्म भारतका प्रधानमन्त्री थिए। २००४ मा अटल बिहारी वाजपेयीको नेतृत्वमा रहेको एनडीए बिरुद्ध कांग्रेसको जितपछि उनले पहिलो पटक प्रधानमन्त्रीको पद सम्हालेका थिए। उनले २००९ देखि २०१४ सम्म दोस्रो कार्यकाल पुरा गरे। त्यसपछि २०१४ मा प्रधानमन्त्री नरेन्द्र मोदीले उनको स्थान लिएका थिए। ३३ वर्षको सेवापछि यस वर्षको सुरुमा उनले राज्यसभा सदस्यको पदबाट सेवानिवृत्त भएका थिए।
कांग्रेस संसदीय दलका अध्यक्ष सोनिया गान्धीले भनिन्, ‘डा मनमोहन सिंहको निधनले हामीले एउटा यस्तो नेता गुमाएका छौं, जो ज्ञान, बडप्पन र विनम्रताको प्रतीक थिए, जसले समर्पणपूर्वक हाम्रो देशको सेवा गरेका थिए। कांग्रेस पार्टीका लागि उनी एक चम्किलो र प्रिय मार्गदर्शक थिए, उनका करुणा र दुरदर्शिताले लाखौँ भारतीयहरूको जीवनलाई परिवर्तन र सशक्त बनाएको थियो। उनका विचार र बुद्धिमानीका सल्लाहहरू देशको राजनीतिक क्षेत्रमा अत्यन्त सम्मानित थिए र विश्वभरिका नेताहरू र विद्वानहरूले उनको सम्मान गरेका थिए। उनले हरेक उच्च पदमा आफूले सामु गर्नुपर्ने काममा प्रतिभा र विशिष्टता ल्याए र भारतलाई गर्व र सम्मान दिलाए।‘ आज कांग्रेस अध्यक्ष मल्लिकाअर्जुन खड्गेले प्रधानमन्त्री नरेन्द्र मोदी र गृहमन्त्री अमित शाहसित फोन गरे, र एक पत्र लेखेर भारतीय राष्ट्रिय कांग्रेसको तर्फबाट डा. मनमोहन सिंहको स्मारक स्थापना गर्नु उनलाई साँचो श्रद्धाञ्जली हुने बताएका छन्।
About Author
