यदि तपाईंलाई कुनै शहर एक दिनमा भ्रमण गर्न असम्भव छ भन्ने लाग्छ भने, क्रोएसियाको इस्त्रिया क्षेत्रमा अवस्थित ‘हुम’ले तपाईंलाई गलत साबित गर्नेछ। संसारकै सबैभन्दा सानो शहर मानिने यो सानो रत्न करिब १०० मिटर लामो छ र यसले आफ्नो मध्ययुगीन आकर्षण र इतिहासलाई जिवित राखेको जस्तो महसुस गराउँछ। किम्बदन्तीका अनुसार, यो शहरलाई दानवहरूले बाँकी रहेका ढुंगाबाट बनाएका थिए, तर हुमको वास्तविक इतिहास सन् ११०२ मा ‘चोल्म’ को रूपमा लेखिएको थियो। शुरुमा यो पहरेदार टावरको रूपमा रहेको हुममा सन् १५५२ मा घण्टाघर र सन् १८०२ मा एउटा पवित्र चर्च निर्माण गरियो। यद्यपि यो सानो छ, यी संरचनाहरू समयको परीक्षा पास गर्दै आजसम्म सुरक्षित छन्, जसले हुमलाई यसको विशेष ऐतिहासिक आकर्षण प्रदान गरेको छ।

मोटा ढुङ्गे पर्खालहरूले घेरिएको यस शहरमा जम्मा दुईवटा गल्ली र थोरै बासिन्दाहरू छन्। सन् २०११ मा यहाँको जनसंख्या ३० मात्र थियो, तर सन् २०२१ सम्म यो बढेर ५२ पुगेको छ। यद्यपि संख्या सानो छ, यो अझै पनि हुमलाई आधिकारिक शहरको मान्यता दिन पर्याप्त छ। यहाँका बासिन्दाहरू शान्त र सरल जीवन बिताउँछन्, जसका अधिकांश घरहरू शताब्दीयौं पुराना ढुंगे भवनहरू हुन्। हुमले स्थानीय संस्कृति झल्काउने अवसर पनि दिन्छ। यहाँका पर्यटकहरूले परम्परागत ‘बिस्का’ ब्रान्डी (ओकिबेलको रक्सी)को स्वाद लिन सक्दछन् र शहरका पुराना ढुङ्गे गल्ली तथा मध्ययुगीन वास्तुकलालाई नजिकबाट अनुभव गर्न सक्छन्। थोरै मानिसहरू भएकोले, हुमले आधुनिक जीवनबाट टाढा शान्त र जादुई अनुभूति प्रदान गर्दछ। सानो भए पनि, हुम अनौठो गन्तव्य खोज्ने पर्यटकहरूका लागि अवश्य हेर्नुपर्ने ठाउँ हो। चाहे इतिहास होस्, किंवदन्ती होस्, वा स्थानीय परम्परा, यो सानो शहरले आफ्नो आकारमा ठूलो आकर्षण अटाएको छ।