नयाँ दिल्ली: भारतीय नौसेनाको सञ्चालन तयारीमा नौसेनाका नागरिक कर्मचारीहरूको अतुलनीय योगदानलाई सम्मान र मान्यता दिनका लागि  ३० दिसम्बर २०२१४ मा नयाँ दिल्लीस्थित डीआरडीओ भवनको डा डीएस कोठारी सभागृहमा एक भव्य स्मरणोत्सव समारोह आयोजना गरिनेछ। यस अवसरमा माननीय रक्षा मन्त्री मुख्य अतिथिका रूपमा उपस्थित रहनेछन्। भारतीय नौसेनाले आफ्ना नागरिक कर्मचारीहरूको प्रशासन र कल्याणमा दक्षता बढाउन २०२४ लाई ‘नौसेना नागरिक वर्ष’ घोषित गरेको थियो। यस समर्पित वर्षमा, नागरिक कर्मचारीहरूसँग सम्बन्धित मानव स्रोत व्यवस्थापन सुधार गर्न र तिनीहरूको व्यावसायिक तथा व्यक्तिगत विकासका विभिन्न पक्षहरूलाई समयमै सम्बोधन गर्ने उद्देश्यले थुप्रै महत्त्वपूर्ण कदम चालिएका थिए।

यस वर्षभरि प्रशासनिक दक्षतालाई अधिकतम बनाउन, डिजिटल रूपान्तरणलाई अपनाउन, नवीन प्रशिक्षण कार्यक्रमहरू शुरु गर्न र कल्याणकारी गतिविधिहरू प्रवर्द्धन गर्न धेरै पहलहरू लागू गरिएका थिए। ‘नौसेना नागरिक वर्ष’मा हासिल भएका प्रमुख उपलब्धिहरूमा नागरिक कार्मिक निर्देशनालयका लागि नागरिक चार्टर, नागरिक कार्मिक व्यवस्थापनसम्बन्धी परिमार्जित मानव स्रोत पुस्तिका र नौसेना नागरिक मानव स्रोत व्यवस्थापनका लागि दिग्दर्शन दस्तावेजको प्रचारजस्ता महत्त्वपूर्ण नीतिहरू समावेश छन्। कल्याण र सुरक्षामा सुधार ल्याउन, लङ्गर/समुद्रमा रहेका जहाजहरूमा काम गर्ने नागरिक कर्मचारीहरूका लागि बीमा सुरक्षाको व्यवस्था र मुम्बईका २१ औद्योगिक इकाइहरूसम्म सीजीएचएस सुविधाको विस्तारजस्ता कदम चालिएका छन्।

डिजिटल र प्रशासनिक आधुनिकीकरण पनि प्राथमिकतामा राखिएको क्षेत्र हो। यसमा नौसेनासँग सम्बन्धित नागरिक व्यवस्थापन सूचना प्रणाली (एनसीएमआईएस) वेबसाइटको नवीकरण, जसमा एनओसी र डीभी अनुमतिका लागि च्याटबट र अनलाइन मोड्युल समावेश छन्, प्रमुख पहलहरूमा पर्दछन्। नौसेनाका राजपत्रित अधिकारीहरूको लागि ई-एचआरएमएस संस्करण २.० पनि शुरु गरिएको छ। नागरिक कर्मचारीहरूको प्रशिक्षण र विकासलाई प्रोत्साहन दिन विशेष कार्यशाला र प्रशिक्षण कार्यक्रमहरूको आयोजना गरियो। आईजीओटी प्लेटफर्ममा नौसेनाका नागरिक कर्मचारीहरूको लागि प्रशिक्षण मोड्युलहरू सुरु गरिएका छन्। आर्थिक लाभहरू सुदृढ गर्ने दिशामा नागरिक कर्मचारीहरूको जीवन बीमाका लागि बजाज लाइफ इन्स्योरेन्ससँग सम्झौता भएको छ र सबै नौसेना नागरिक कर्मचारीहरूको लागि रक्षा तलब प्याकेज लागू गरिएको छ। यो ‘नौसेना नागरिक वर्ष’ राष्ट्रको समुद्री सुरक्षा र सञ्चालन उत्कृष्टता सुनिश्चित गर्न आफ्ना नागरिक कर्मचारीहरूको महत्त्वपूर्ण भूमिकालाई मान्यता दिने भारतीय नौसेनाको प्रतिबद्धतालाई रेखाङ्कित गर्छ। यो पहल सबै सरोकारवालाहरूका लागि एक सशक्त र समावेशी वातावरण प्रवर्द्धन गर्ने प्रमाण हो। -पीआईबी