जलपाईगढी: युवा पुस्तालाई लागुपदार्थको लतबाट मुक्त गर्न र स्वस्थ समाज निर्माण गर्न जलपाईगढीमा आज बिहान म्याराथन दौड आयोजना गरियो। जाडोको  मौसममा आइतबार बिहान जलपाईगढी शहरको टिस्टा पार पीडब्ल्युडी मोडमा एक फरक तस्वीर देखियो। लागुऔषधमुक्त समाज र स्वस्थ जीवनको उदेश्यका साथ साढे ६ किलोमिटर म्याराथन दौडमा जिल्लाका विभिन्न स्थानबाट नयाँ पुस्ताका युवा–युवतीहरू भेला भए। प्रत्येक वर्ष जस्तै यस वर्ष पनि प्रकाश फाउन्डेसनको जलपाईगढी इकाईले म्याराथन आयोजना गरेको थियो। यस संस्थाले हरेक वर्ष राज्यभर विभिन्न सामाजिक कार्यहरू गर्दै आएको छ। म्याराथन दौडलाई पूर्व पञ्चायत प्रमुख कृष्ण दास र प्रकाश फाउण्डेसनका अध्यक्ष नयन्दु मल्लिकले हरियो झण्डा फहराएर शुरु गरे। उक्त अवसरमा सदर पञ्चायत समितिका अध्यक्ष लगायत अन्य महानुभावहरुको उपस्थिति रहेको थियो। म्याराथनको उद्घाटन गर्दै कृष्ण दासले भने; ‘यस्तो पहलको म प्रशंसा गर्छु, खेलकुदले मन र शरीरलाई स्वस्थ राख्छ, यी दुवै कुरा नयाँ पुस्ताका लागि सही भएमा समाज अगाडि बढ्ने छ। यस पुस्तालाई मोबाइलको लतलगायत अन्य समस्याबाट मुक्त गर्न आवश्यक छ, जसमा यस्ता गेमले ठूलो भूमिका खेल्न सक्छन्।‘