कोलकाता: कोलकातामा सोनागाछीका रुपवतीहरूको गिरोहले ट्याक्सी यात्रुलाई बन्धक बनाएर उनीबाट १.०६ लाख रुपियाँ लुटेको समाचार छ। समाचारअनुसार, घटना बडतल्ला पुलिस चौकी अन्तर्गत जतिन्द्र मोहन एभिन्यूमा रहेको जटाधारी पेट्रोल पम्प नजिक भएको हो। घटनामा पुलिसले तीन जना महिलालाई पक्राउ गरेको छ। तीनै जनालाई सोमबार ब्यांकशाल अदालतमा पेश गर्दा उनीहरुलाई १८ दिसम्बरसम्म पुलिस  हिरासतमा पठाइएको छ। समाचारअनुसार, दमदम क्यान्टोन्मेन्टका कौशिक चक्रवर्तीले १४ दिसम्बरमा लुटपाट भएको उजुरी दायर गरेका थिए। ३ दिसम्बरमा  धर्मतल्लाबाट ट्याक्सीमा घर फर्कदै गर्दा शोभाबजार क्षेत्रको जटाधारी पेट्रोल पम्प नजिक ७ जना महिलाको समूहले ट्याक्सी रोकेको उनले उजुरीमा बताए। महिलाले उनलाई जबरजस्ती ट्याक्सीबाट बाहिर निकालेर बन्धक बनाएको आरोप छ। आरोपितले उनलाई सोनागाछी क्षेत्रको एउटा कोठामा लगेर ताला लगाएको आरोप छ। पछि रिहाइको सट्टामा उनीबाट राजेश मिस्त्री नामका व्यक्तिको अनलाइन वलेटमा रु० ८१ हजार र २५ हजार नगद पनि लुटिएको थियो। पैसा लुटेपछि महिलाले घरबाट निकालेको आरोप छ। लुटपाटको शिकार भएपछि ती व्यक्तिले पुलिस चौकीमा उजुरी दिएका थिए  घटनाको अनुसन्धानका क्रममा पुलिसले आरोपीलाई पक्राउ गरेको छ। हाल पुलिसले घटनामा संलग्न अन्य फरार व्यक्तिहरुको खोजी गरिरहेको छ।