बंगलादेशमा शेख हसिनालाई सत्ताबाट हटाइएपछि भारतसँगको सम्बन्धमा चिरा पर्ने आउने सम्भावना देखिएको छ। पछिल्लो घटनाक्रमले बंगलादेश खुलेर भारतको विरोध गरिरहेको स्पष्ट संकेत गरेको छ। ताजा घटनाक्रममा अन्तरिम सरकारका प्रमुख प्रा. डा मुहम्मद यूनुसले युरोपेली देशहरूलाई आग्रह गरेका छन् कि उनीहरूले बंगलादेशीका लागि आफ्नो भिसा केन्द्रहरू दिल्लीबाट हटाएर ढाका वा कुनै अर्को छिमेकी देशमा स्थानान्तरण गरून्। यो कुरा स्थानीय मिडियामा आएका ती रिपोर्टहरूको केही दिनपछि सार्वजनिक भएको हो, जसमा ढाकाले आलु र प्याज जस्ता मुख्य खाद्य पदार्थहरू आयात गर्न अन्य स्रोतहरूप्रति ध्यान दिइरहेको उल्लेख गरिएको थियो। प्रा. यूनुसले ढाकाको तेजगाउँस्थित आफ्नै कार्यालयमा युरोपेली देशका कूटनीतिज्ञहरूसँगको भेटघाटका क्रममा यो आग्रह गरे। बैठकमा ढाका र नयाँ दिल्ली दुवै ठाउँमा नियुक्त १९ भन्दा बढी कूटनीतिज्ञ सहभागी थिए। यूनुसले भारतको “भिसा प्रतिबन्धहरू”लाई माग बढ्ने कारण बताउँदै भने, “बंगलादेशीहरूका लागि भारतको भिसा प्रतिबन्धले धेरै विद्यार्थीहरूलाई अनिश्चिततामा पारेको छ, जो युरोपेली भिसाका लागि दिल्ली जान सक्दैनन्।” उनले आरोप लगाए कि यसको परिणामस्वरूप युरोपेली विश्वविद्यालयहरू प्रतिभाशाली बंगलादेशी विद्यार्थीहरूबाट वञ्चित भइरहेका छन्। उनले कूटनीतिज्ञहरूलाई भने, “भिसा कार्यालयहरूलाई ढाका वा कुनै नजिकैको देशमा स्थानान्तरण गर्दा बंगलादेश र युरोपेली संघ दुवैलाई फाइदा हुनेछ।” ढाका ट्रिब्यूनको रिपोर्टअनुसार, ढाकाका अधिकारीहरूले बंगलादेशीका लागि भिसा केन्द्रलाई इन्डोनेसिया र भियतनाममा स्थानान्तरण गरिसकेको बुल्गेरियाको उदाहरण पनि प्रस्तुत गरेका छन्। कूटनीतिज्ञहरूले ढाकाको सुधार पहललाई समर्थन गर्ने प्रतिवद्धता जनाउँदै नयाँ बंगलादेश निर्माणमा सल्लाह र सहायता प्रदान गर्ने वाचा गरेका छन्। यूनुसले बंगलादेशबारे “व्यापक गलत सूचना”को पनि चर्चा गरे र यसको सामना गर्न युरोपेली संघबाट सहयोग मागे। उनले पूर्व प्रधानमन्त्री शेख हसिना र उनका सहयोगीहरूले “देशलाई अस्थिर बनाउन ठूलो परिमाणमा धन शोधन” गरेको आरोप पनि लगाए। यसैबीच, बंगलादेशले सोमबार भनेको छ कि भारतले बंगलादेशी नागरिकहरूका लागि भिसा बढाउने कदम चाल्ने वाचा गरेको छ। यो बयान मुख्य सल्लाहकार डा मुहम्मद यूनुस र भारतीय विदेश सचिव विक्रम मिस्रीबीचको भेटपछि आएको हो। पर्यावरण सल्लाहकार सईदा रिजवाना हसनले पत्रकारहरूसँग भने, “मिस्रीले बंगलादेशी पक्षसँग यो कदम चाल्ने वाचा गरेका छन्।” हाल भारतले बंगलादेशीहरूलाई सीमित भिसा दिइरहेको छ। विदेश मन्त्रालयका अनुसार, उनीहरूले चिकित्सा र अन्य अत्यावश्यक कारणका लागि सीमित भिसा जारी गरिरहेका छन्। विदेश मन्त्रालयका अधिकारीहरूले गत महिना भनेका थिए, “हामी पहिले नै चिकित्सा भिसा र आपतकालीन आवश्यकताका लागि भिसा जारी गरिरहेका छौँ। कानून र व्यवस्था स्थितिमा सुधार आएपछि र सामान्य भिसा सञ्चालन (बंगलादेशमा) पुनः शुरु गर्न उपयुक्त स्थिति बनेपछि हामी त्यसो गर्नेछौँ।”