मुम्बई: अल्लू अर्जुन-सुकुमारको फिल्म पुष्पा २ ले भारतीय बक्स अफिस थर्काएको छ। बनीले भारतीय सिनेमा इतिहासमा एक ठूलो रेकर्ड बनाएका छन्। भारतमा अहिलेसम्म पहिलो दिनमा सर्वाधिक कलेक्सन गर्ने फिल्महरूमा आरआरआर २२३ करोड रुपियाँसहित पहिलो स्थानमा थियो। अब पुष्पा २ ले यो रेकर्ड तोडेको छ। बनीले यस फिल्ममार्फत बक्स अफिसमा आफ्नो ब्रान्ड पावर देखाएका छन्। पुष्पा रूल ४ डिसेम्बरको रातदेखि सिनेमा हलहरूमा सुरु भएको थियो। कलेक्सनको मामिलामा यो टलीवुड, बलिउड र ओभरसिजमा शीर्ष स्थानमा छ। यसले प्रि-सेल बुकिङमा पनि आक्रामकता देखाउँदै निरन्तर राम्रो प्रदर्शन गरिरहेको छ। यसरी, पहिलो दिन पुष्पा २ ले विश्वभर २९४ करोड रुपियाँको कलेक्सन गर्दै नयाँ रेकर्ड बनाएको छ। यसमा सबैभन्दा ठूलो हिस्सेदारी दुई तेलुगु राज्यहरूको छ। अमेरिका मात्रमा पुष्पा २ ले ३५ करोड रुपियाँ कमाएको छ। पुष्पा २ लाई विश्वभर १२,५०० स्क्रिन्समा डल्बी, आइमैक्स, डिबक्स, ४डीएक्स, आइस, २डी र ३डी भर्सनमा रिलिज गरिएको छ। बनी (अल्लू अर्जुन) अहिलेसम्मका सबै पुराना रेकर्डहरू तोडिरहेका छन्। बुक माई शोमा एक घण्टामा एक लाखभन्दा बढी टिकट बिक्री गरेर यसले नयाँ रेकर्ड बनाएको छ। यसअघि प्रभासको कल्कि नामक फिल्मको नाममा रहेको रेकर्डलाई अल्लू अर्जुनको पुष्पा २ ले पछाडि पारेको छ। पुष्पा २  ले भारतमा एड्भान्स बुकिङमा २५,१९,२६६ टिकट बिक्री गरेर ७३ करोड रुपियाँको कलेक्सन गरेको छ। यसले बाहुबली २, जवान, आरआरआर जस्ता ब्लकबस्टर फिल्महरूको एड्भान्स बुकिङ रेकर्डलाई पनि पछाडि पारेको छ। अब हेर्न बाँकी छ, यो फिल्म अन्ततः कति रेकर्ड तोड्छ।