कोलकाता: सीपीआर (कार्डियोपल्मोनरी रेससिटेसन) तयार समुदाय निर्माण गर्ने महत्त्वपूर्ण कदमस्वरूप मणिपाल अस्पताल समूहको भाग रहेको मेडिका सुपरस्पेशालिटी अस्पतालले ऐतिहासिक भारतीय संग्रहालयको प्रांगणमा मेगा सीपीआर प्रशिक्षण कार्यक्रम आयोजना गर्न भारतीय संग्रहालयसँग सहकार्य गर्‍यो। कार्यक्रम आज बिहान ११ बजे शरू भयो, जसको नेतृत्व मेडिका सुपरस्पेशालिटी अस्पतालको इमरजेन्सी विभाग प्रमुख र यूएसएको इंटरनेशनल भिजिटरशिप लिडरशिप प्रोग्राम (आईभीएलपी) का पूर्व सहभागी डा इन्द्रनील दासले गरे। प्रशिक्षण सत्रमा चर्चित विद्यालय र संस्थाका स्वयंसेवकहरूको सहभागिता रह्यो, जसमा सेन्ट जेभियर्स हाई स्कूल, हावडा, डगलस मेमोरियल स्कूल, सेन्ट सेबास्टियन स्कूल, एनेक्स कलेज, आदित्य एकाडेमी सीनियर सेकेन्डरी (दमदम) र आदित्य एकाडेमी सेकेन्डरी (बारासात) रहेका थिए।

कार्यक्रमको प्रमुख अतिथिका रूपमा जापानी महावाणिज्यदूत नकागावा कोइचीले उपस्थिति जनाई यो महत्त्वपूर्ण पहललाई समर्थन प्रदान गरे। मणिपाल अस्पताल (ईस्ट) का क्षेत्रीय प्रमुख डा अयनभ देबगुप्ताले भने, “भारतमा  हृदयघात भएका झन्डै आधा बिरामीहरू लक्षण शुरु भएको ४०० मिनटपछि मात्र अस्पताल पुग्छन्, जबकि यो आदर्श समय ३० मिनट भित्र हुनुपर्ने हो। विशेषज्ञहरू भन्छन् कि हृदयघातको १८ मिनट भित्र सहयोग नभएमा क्षति पुनःप्राप्ति असम्भव हुन्छ। सीपीआर प्रशिक्षणले अस्पतालको चिकित्सा सहयोग आउँदासम्म प्राथमिक सहायता प्रदान गर्न मद्दत गर्दछ। यस वर्षभरी हामीले विद्यालय, कलेज, कार्यालय र अन्य संस्थाहरूमा विभिन्न सीपीआर प्रशिक्षण सत्र आयोजना गरेका छौँ र आगामी दिनहरूमा पनि यस्ता कार्यक्रम निरन्तर गर्ने योजना छ।”

भारतीय संग्रहालयका निर्देशक अरिजित दत्ता चौधरीले भने, “यो पहल हाम्रो प्राथमिकता भित्र पर्दछ। हामीले यसअघि मेडिका अस्पतालसँग मिलेर आफ्ना कर्मचारीहरूलाई सीपीआर प्रशिक्षण गरिसकेका छौँ। यो कार्यक्रममार्फत विद्यालय, कलेज र अन्य संस्थाहरूमा सुरक्षा र तयारीको संस्कार प्रवर्द्धन गर्न हाम्रो लक्ष्य हो। हामी बुझ्छौं कि ढिला हुने चिकित्सा सेवाले स्वास्थ्यमा गम्भीर असर पार्छ। समयमै सहायता पाउनु, विशेष गरी हृदयघात वा आपतकालीन परिस्थितिमा, अत्यन्त महत्त्वपूर्ण हुन्छ।”

भारतीय संग्रहालयका उप-निर्देशक डा सायन भट्टाचार्यले भने, “भारतकै सबैभन्दा पुरानो र ठूलो संग्रहालयका रूपमा भारतीय संग्रहालयले सांस्कृतिक सम्पदासँगै जनचेतना र ज्ञान वृद्धिमा पनि महत्त्वपूर्ण भूमिका खेलिरहेको छ। यस वर्षको शुरुमा हामीले आफ्ना कर्मचारीहरूका लागि बीएलएस (बेसिक लाइफ सपोर्ट) प्रशिक्षणका लागि मेडिका अस्पतालसँग सहकार्य गर्‍यौं, जुन सफल रह्यो।” हालै ३० र ४० वर्षका थुप्रै चर्चित व्यक्तिहरूमा हृदयघातको घटनाले यस विषयमा थप ध्यानाकर्षण गराएको छ। चिकित्सकहरूका अनुसार, आकस्मिक हृदयघातको अवस्थामा सीपीआर तत्काल प्रयोग गर्न सकिएमा मृत्यु दरलाई धेरै हदसम्म कम गर्न सकिन्छ। त्यसैले सीपीआर प्रशिक्षण समाजमा अत्यावश्यक आवश्यकता बन्न गएको छ।