लण्डन: ईंग्लिश प्रीमियर लीग फूटबल प्रतियोगितामा गत सीजनको च्याम्पियन म्यानचेष्टर सिटीले ७ वटा म्याचपछि अन्तमा गएर जीतको लय हासिल गऱ्यो। यसबीच शीर्षमा रहने लिभरपूल चाहिँ ड्र-मा रोकियो। बुधवार राति खेलिएको म्याचमा म्यानचेष्टर सिटीले नटिंघम फरेष्टलाई ३-०-ले पराजित गऱ्यो। यस जीतको साथै सिटीले गत ७ वटा म्याचदेखि जारी खराब प्रदर्शनको क्रमबाट पनि मुक्ति पायो। आफ्नो होम ग्राउण्ड ऐतिहाद स्टेडियममा ६७ प्रतिशत पोजेशनको साथ खेल्ने पेप ग्वार्डियोलाको टीमबाट बर्नार्डो सिल्वाले आठौं, केविन डी ब्रूयेनले ३१औं र जेरेमी डोकुले ५७औं मिनटमा गोल गरे। यस जीतपछि म्यानचेष्टर सिटी १४ वटा म्याचमा २६ पोइण्ट्सको साथ प्रीमियर लीग टेबलको चौथो स्थानमा रहन पुग्यो। यसरी छैटौं स्थानमा रहने नटिंघम फरेष्टसँग २२ पोइण्ट्स रहेको छ। यसरी आर्सनलले अन्य एउटा हाई भोल्टेज म्याचमा म्यानचेष्टर युनाइटेडलाई २-०-ले पराजित गऱ्यो। आफ्नो होम ग्राउण्ड एमिरेट्स स्टेडियममा ५१ प्रतिशत पोजेशनको साथ खेल्ने आर्सनलले म्याचको दुवै गोल मध्यान्तरपछि दर्ता गऱ्यो। विजेता टीमबाट जूरिएन टिम्बरले ५४औं र विलियम सलिबाले ७३औंं मिनटमा गोल गरे। यस जीतपछि आर्सनल २८ पोइण्ट्सको साथ गोल अन्तरको आधारमा तेस्रो स्थानमा रह्यो। यसरी म्यानचेष्टर युनाइटेड १९ पोइण्ट्सको साथ ११औं स्थानमा रहेको छ। यसरी असाधारण फर्ममा रहने लिभरपूललाई चाहिँ न्यूक्यासलले ३-३-को ड्र-मा रोक्यो। यस अवे म्याचमा ५९ प्रतिशत पोजेशनको साथ खेल्ने लिभरपूल एक समय जीतको नजिक पुगिसकेको थियो तर होम टीमले अन्तिम क्षणमा गोल हासिल गरी म्याच बचायो। लिभरपूलबाट मोहामेद सलाहले ६८औं र ८३औंं मिनटमा २ गोल गरे। यसबाहेक कुर्टिस जोन्सले 50औं मिनटमा गोल गरे। न्यूक्यासलबाट अलेक्जेण्डर इसाकले ३५औं, एन्थोनी गोर्डनले ६२औं र फाबियन श्चारले ९०औं मिनटमा गोल गरे। यस ड्र पछि पनि लिभरपूल १४ वटा म्याचमा ३५ पोइण्ट्सको साथ शीर्ष स्थानमा कायम रह्यो। यसरी न्यूक्यासल २० पोइण्ट्सको साथ दशौं स्थानमा रहेको छ। चेल्सीले दशजना खेलाड़ीको साथ खेल्न वाध्य हुने साउथम्प्टनलाई ५-१-ले पिट्यो। म्याचमा असल शुरुवात गरे पनि होम ग्राउण्डमा खेलिरहेको साउथम्प्टन ३९औं मिनटमा १० जना खेलाड़ीमा सीमित भयो कारण टीमका डिफेण्डर ज्याक स्टेफन्सले रेड कार्ड देख्नु पऱ्यो। चेल्सीबाट एलेक्स डिसासीले सातौं, क्रिस्टोफर एन्कुन्कुले १७औं, नोनी मादुएकेले ३४औंं, कोल पाल्मरले ७६औं र जेडोन साञ्चोले ८७औं मिनटमा गोल गरे। यसरी साउथम्प्टनबाट जो एरिबोले ११औं मिनटमा गोल गरे।यस जीतपछि चेल्सी २८ पोइण्ट्स लिएर गोल अन्तरको आधारमा दोस्रो स्थानमा पुग्यो। प्रीमियर लीगका अन्य म्याचहरूमा लिस्टर सिटीले वेष्ट ह्यामलाई ३-१-ले, क्रिस्टल प्यालेसले इप्सविच सिटीलाई १-०-ले, एभर्टनले वूल्भ्सलाई ४-०-ले अनि एस्टन भिल्लाले ब्रेण्टफोर्डलाई ३-१-ले पराजित गऱ्यो।