द्रुत आर्थिक वृद्धि र आधुनिकीकरणका लागि प्रसिद्ध दक्षिण कोरिया अहिले गम्भीर जनसंख्या संकटको सामना गरिरहेको छ। यदि यो अवस्था यस्तै रहिरह्यो भने, शताब्दीको अन्त्यसम्म देशको जनसंख्या वर्तमान आकारको एक तिहाइसम्म घट्न सक्छ। दक्षिण कोरियाको प्रजनन दर पहिले नै संसारमा सबैभन्दा कम छ र यसमा निरन्तर गिरावट आइरहेको छ। देशमा विलुप्त हुने सम्भावनाबारे बहस शुरु भइसकेको छ। तथ्यांक अनुसार, स्ट्याटिक्स कोरियाको रिपोर्टले देखाउँछ कि २०२२ को तुलनामा २०२३ मा देशको प्रजनन दरमा ८ प्रतिशत गिरावट आएको छ। विशेषज्ञहरूले चेतावनी दिएका छन् कि यो क्रम जारी रहेमा दक्षिण कोरियाको ५१ मिलियन जनसंख्या २१०० सम्म आधा हुनेछ। २०२३ मा देशको जन्मदर प्रति महिला ०.७२ नानीहरूमा झरेको छ, जुन कीर्तिमानी न्यूनतम स्तर हो, र यो वर्ष थप घटेर ०.६ मा पुग्ने अपेक्षा छ। यस समस्यालाई समाधान गर्न दक्षिण कोरियाली सरकारले प्रत्येक नानी जन्माउँदा आमाबाबुलाई १०० मिलियन वोन (कोरियाली मुद्रा) नगद दिने योजना बनाइरहेको छ। सरकारले आफ्नो बजेटको आधा हिस्सा यो योजनामा खर्च गर्ने योजना बनाएको छ।

यस योजनाबाट घट्दो जनसंख्या दरमा सुधार आउने आशा गरिएको छ। योजना लागू गर्नु अघि, दक्षिण कोरियाको एंटी करप्शन एन्ड सिभिल राइट्स कमिसनले सर्वसाधारणको राय लिन सर्वेक्षण गरिरहेको छ। हाल, दक्षिण कोरियामा नानी जन्मेदेखि ७ वर्षको उमेरसम्म आमाबाबुलाई विभिन्न प्रोत्साहन र सहयोग कार्यक्रम अन्तर्गत ३५ मिलियन वोनदेखि ५० मिलियन वोनसम्म प्रदान गरिन्छ। यसका अतिरिक्त, ३० वर्षको उमेरसम्म तीन वा बढी नानी जन्माउने पुरुषहरूलाई सैन्य सेवा छूट, कर छुटजस्ता सुविधाहरू पनि दिइन्छ। संकटका कारणहरू दक्षिण कोरियाको जनसंख्या संकटका पछाडि धेरै कारणहरू जिम्मेवार छन्।  जीवनयापनको उच्च लागत: जीवनयापनको खर्च बढ्दै गएका कारण जोडीहरूले नानी जन्माउने कुरालाई जीवनस्तर घट्ने चिन्तासँग जोडेर हेर्छन्। महिलाको करियर प्राथमिकता: शहरी महिलाहरू परिवार सुरु गर्नुभन्दा आफ्नो करियरलाई प्राथमिकता दिन्छन्। लैङ्गिक असमानता: महिलाहरू घरायसी काममा पुरुषको बराबर सहभागिता चाहन्छन्, तर यो अपेक्षा अझै पूरा हुनसकेको छैन। यो समस्याको जड १९६० को दशकमा पुगेको छ, जब दक्षिण कोरियाले जनसंख्या नियन्त्रणका लागि परिवार नियोजन नीतिहरू लागू गर्‍यो। त्यतिबेला देशको प्रजनन दर प्रति महिला ६ जना नानी  थियो। १९८२ सम्ममा यो दर घटेर २.४ मा पुगेको थियो। तर ती योजनाहरू, जसले देशको आर्थिक प्रगतिको जग बसायो, आज देशको अस्तित्वका लागि संकट बनेका छन्। विशेषज्ञहरूका अनुसार यो शताब्दीको अन्त्यसम्ममा दक्षिण कोरियाको जनसंख्या ५२ मिलियनबाट घटेर केवल १७ मिलियन हुन सक्ने सम्भावना छ। यो स्थिति देशको अर्थतन्त्रलाई अस्थिर बनाउनुका साथै सामाजिक चुनौतीहरूको प्रमुख कारण बन्नसक्छ।