नयाँ दिल्ली: विश्वको सबैभन्दा सुन्दर भवन ताजमहलमा मंगलबार बम पड्काउने धम्की आएको छ। सञ्चारमध्यमहरूको समाचारअनुसार, यो धम्कीपूर्ण मेल पर्यटन विभागलाई पठाइएको छ। यो धम्की पाएपछि ताजमहल वरपर सुरक्षा बढाइएको छ। अर्कोतर्फ, ताजमहल भित्र छानबिन भइरहेको छ र ताज सुरक्षा पुलिस पनि मेल पठाउनेको खोजीमा जुटेको छ। एसीपी ताज सुरक्षा सैयद अरिब अहमदले भने, ‘पर्यटन विभागले इमेल प्राप्त गरेको छ। त्यसको आधारमा ताजगञ्ज पुलिस चौकीमा मुद्दा दर्ता गरिएको छ। थप अनुसन्धान भइरहेको छ।‘ वास्तवमा, मंगलबार आगराको उत्तर प्रदेश पर्यटनको क्षेत्रीय कार्यालयलाई एउटा इमेल पठाइएको थियो, जसमा ताजमहललाई बमले उडाउने धम्की दिइएको थियो। एएसपी (एसीपी-ताज सेक्युरिटी) सैयद अरिब अहमदले भने, ‘युपी टुरिजमले ताजमहललाई विस्फोट गराउने धम्की दिएको इमेल प्राप्त गरेको छ।’

एएसपी (एसीपी-ताज सेक्युरिटी) सैयद अरिब अहमदले भने, ‘इमेलका अनुसार हामीले केही पाएका छैनौं। सुरक्षा जाँचका लागि बम डिस्पोजल स्क्वाड, स्निफर डग र अन्य टोली ताजमहल पुगेका छन्।‘ उत्तर प्रदेश टुरिजमका उपनिर्देशक दीप्ती वत्सले भने, ‘हामीले मंगलबार बमको धम्की भएको इमेल प्राप्त गरेका थियौं, त्यसपछि हामीले आगरा पुलिस र एएसआईलाई इमेल पठाएका थियौं।‘ यसैबीच आगरा पुलिस र ताज सेक्युरिटी पुलिसले इमेलबारे अनुसन्धान गरिरहेको छ र धम्कीपूर्ण इमेल कसले र कहाँबाट पठाएको हो भन्ने पत्ता लगाउन प्रयास भइरहेको छ। ताजमहल हेर्न र संगमरमरको सुन्दर भवन देखेर आफ्नो चाहना पूरा गर्न हरेक दिन ठूलो संख्यामा स्वदेशी तथा विदेशी पर्यटक ताजमहल आउने गर्छन्। ताजमहलमा पहिलेदेखि नै कडा सुरक्षा व्यवस्था छ, तर धम्कीपूर्ण मेल आएपछि ताजमहलको सुरक्षा अझ बढाइएको छ।