बिराट चौक: रोजगारीको सिलसिलामा ८ वर्ष मलेसिया बसेर पाँच वर्षअघि स्वदेश फर्किएका दिलीप श्रेष्ठ बेलबारीमा होटल संचालन गर्दछन।
पाँच वर्षअघि यो व्यवसाय सुरु गर्दा सातामा करिब २० देखि ३० किलो मात्र सुकुटी बिक्री गर्थे। अहिले दिनकै ६ सय किलोको सुकुटी बिक्री हुन्छ। होटलमा माग बढ्दो छ, सुकुटी किनेर लैजानेको संख्या पनि मनग्गै छ। बेलबारी–११ लक्ष्मीमार्गमा दिलिपसहित अन्यले उत्पादन गरेको सुकुटी विदेशी बजारसम्म पुग्छ।
लक्ष्मीमार्ग बजार क्षेत्रमा रहेका पसलले उत्पादन गरेको राँगाको मासुबाट बनाइने सुकुटी स्वदेशमा मात्र नभई विदेशमा पनि पुगेको हो। बजारको माग बढेपछि सुकुटीको व्यापार पनि फस्टाएको छ। स्वदेशमै स्वरोजगार बन्ने उद्देश्यले लक्ष्मीमार्गका केही युवाले सुरु गरेको सुकुटी पसलले हाल विदेशको कमाइलाई बिर्साइदिएको छ। ६ वर्ष वैदेशिक रोजगारीको सिलसिलामा कतार बसेर आएका प्रेम श्रेष्ठले करिब १० वर्षदेखि लक्ष्मीमार्गमा सुकुटी व्यवसाय गर्दै आएका हुन्। सुकुटीको माग दैनिक बढेसँगै पेसाप्रति सन्तुष्टि रहेको उनले बताए।
‘स्वदेशी बजारमा भन्दा विदेशमा बस्ने नेपालीले यहाँको सुकुटी माग गर्दछन, जनशक्ति अभावमा माग पूरा गर्न सकिएको छैन,’ उनले भने। विदेशमा रहेका नेपालीहरुमा कोसेलीको रुपमा सुकुटीको माग उच्च छ। तर बनाउन धेरै झन्झट र मिहेनत पर्ने भएकाले मागअनुसार पुर्‍याउन नसकिएको श्रेष्ठ बताउँछन्।
प्रतिकिलो दुई हजारमा बिक्री भइरहेको सुकुटी व्यापारले हाल विदेशको कमाइलाई बिर्साइदिएको छ। मासिक दुई लाखसम्म आम्दानी भइरहेको उनी बताउँछन्।
वैदेशिक रोजगारीको सिलसिलामा सात वर्ष कतारमा काम गरेर आएका शोभितमान श्रेष्ठ ९ वर्षदेखि लक्ष्मीमार्गमा सुकुटी व्यापार गर्दै आएका छन्। साताको १० किलो मासु ल्याएर सुकुटी बनाउने गरेकामा हाल दैनिक २० देखि २५ किलो सुकुटी बनाउने गरेको उनी बताउँछन्। लक्ष्मीमार्गमा दैनिक राँगाको सुकुटीको माग बढ्दो क्रममा रहेको र आफूलाई भ्याइनभ्याइ भएको उनले बताए । विशेष गरी खाडी मुलुकमा रहेकाहरूले मगाउने उनी बताउछन्।
विदेशको भन्दा परिवारसँगै घरमा बसेर गरेको व्यवसायले सन्तुष्टि मिलेको उनले बताए। पूर्व पश्चिम राजमार्ग भएर यात्रा गर्ने धेरै टाढाटाढाबाट यहाँको सुकुटीको स्वाद चाख्न ग्राहकहरु आउने गरेको होटल सञ्चालक टफिनबाबु श्रेष्ठ बताउँछन्। लक्ष्मीमार्गको नयाँ परिचय यहाँको सुकुटी बनेको पनि उनले बताए।