नयाँ दिल्ली: रक्षा अनुसन्धान तथा विकास संगठन (डीआरडीओ) ले १६ नोभेम्बर २०२४ को राति अबेर ओडिशाको तटमा रहेको डा एपीजे अब्दुल कलाम द्वीपबाट भारतको पहिलो लामो दुरीको हाइपरसोनिक मिसाइलको सफल परीक्षण सम्पन्न गर्‍यो। यो हाइपरसोनिक मिसाइललाई सशस्त्र बलहरूका लागि १,५०० किलोमिटरभन्दा धेरै दूरीसम्म विभिन्न विस्फोटक सामग्रीहरू बोक्न सक्ने गरी डिजाइन गरिएको छ। यो मिसाइललाई विभिन्न रेञ्ज प्रणालीहरूले ट्र्याक गरे। डाउन रेञ्जमा रहेका शिप स्टेसनबाट प्राप्त उडान डाटाले अत्यन्त सटीकताका साथ सफल टर्मिनल कौशल र प्रभाव पुष्टि गर्‍यो।

यस मिसाइललाई हैदराबादस्थित डा एपीजे अब्दुल कलाम मिसाइल कम्प्लेक्सका प्रयोगशालाहरू, डीआरडीओका विभिन्न प्रयोगशालाहरू र उद्योग साझेदारहरूले भारतमै विकास गरेका हुन्। यो उडान परीक्षण डीआरडीओका वरिष्ठ वैज्ञानिक र सशस्त्र बलका अधिकारीहरूको उपस्थितिमा सम्पन्न भएको थियो। रक्षा मन्त्री राजनाथ सिंहले एक्समा एउटा पोस्ट गर्दै यस उडान परीक्षणलाई ऐतिहासिक उपलब्धि बताएका छन्। यस उपलब्धिसँगै भारत ती केही छानिएका देशहरूको समूहमा समावेश भएको छ, जसको पहुँचमा यस्ता अत्याधुनिक र उन्नत सैन्य प्रविधिहरू छन्। उनले डीआरडीओ, सशस्त्र बल र उद्योगलाई यो सफल उडान परीक्षणका लागि बधाई दिएका छन्। रक्षा अनुसन्धान तथा विकास विभागका सचिव तथा डीआरडीओका अध्यक्ष डा समीर भी कामतले पनि यो सफल मिशनमा सक्रिय योगदान दिएका डीआरडीओको टोलीलाई बधाई दिएका छन्। -पीआईबी