सिलगढी: सिलगढीमा पुष्पा छेत्री हत्या काण्डको रहस्य पुलिसले सुल्झाएको छ। घटनाको अनुसन्धान गर्दा अनुसन्धानकर्ताहरू चकित परे। युवतीको एक व्यक्तिसँग कहिल्यै प्रेम सम्बन्ध रहेको, र त्यही व्यक्तिले सुपारी किलरमार्फत युवतीको हत्या गराएको समाचार छ। हत्या गर्ने व्यक्ति पनि युवतीकै क्षेत्रका बासिन्दा रहेको अनि एक अर्कालाई पहिले नै चिन्दथे। यही परिचयको कारण उनीहरूले पुष्पा छेत्रीको घरभित्र पसेर धारिलो हतियारले उनको आक्रमण गरी हत्या गरेको समाचार छ। ८ नोभेम्बरमा सिलगढीको भानुनगरमा पुष्पा छेत्री नामक युवतीको शव फेला परेको थियो। मालबजार निवासी पुष्पा छेत्री सिलगढीको एक ब्यूटी पार्लरमा काम गर्थिन्। हत्याको घटनामा भक्तिनगर थानाको पुलिसले हालसम्म तीन जनालाई पक्राउ गरेको छ। दुई जनालाई सिलगढीबाट र एक जनालाई चेन्नईबाट पक्राउ गरिएको छ।

हत्याको अनुसन्धानका क्रममा पुलिसले पत्तो लगाएआनुसार, पुष्पा छेत्री अरुण पटेल नामका एक व्यक्तिसँग सम्बन्धमा थिइन्। अरुण पञ्जाबमा अर्धसैनिक बलमा कार्यरत छन्। उनी सो सम्बन्धबाट बाहिर निस्कन चाहन्थे। अरुणकी पत्नी प्रीतिका पटेललाई यो अफेयरबारे थाहा भयो। त्यसपछि पति-पत्नीले दुई युवकलाई पुष्पाको हत्या गर्न सुपारी दिए। पुष्पा मालबजारको बगराकोटकी बासिन्दा थिइन्। बाग्राकोटकै बासिन्दा अभिषेक दर्जी र रुस्तम विश्वकर्मालाई पुष्पाको हत्या गर्न सुपारी दिइएको समाचार छ। हत्या गर्नुअघि उनीहरूलाई ५० हजार रुपियाँ अग्रिम दिइएको थियो। ७ नोभेम्बरको राति करिब १० बजे उनीहरू सिलगढीस्थित पुष्पाको भाडाको कोठामा पुगे। उनीहरू त्यहाँ करिब ४५ मिनेटसम्म बसे। पुलिसको अनुमानअनुसार, त्यही समय पुष्पालाई धारिलो हतियारले आक्रमण गरेर हत्या गरिएको थियो। भोलिपल्ट अभिषेक ट्रेनमार्फत चेन्नईतर्फ गए। उनी त्यहाँ एउटा होटलमा काम गर्थे। हत्या पछि उनी त्यही काम गरिरहेका थिए। त्यसैगरी, रुस्तम विश्वकर्मा बाग्राकोट फर्किए। यस बीच, अरुण पटेलकी पत्नी सिलगढीमै थिइन्। अभिषेकलाई शुक्रबार चेन्नईबाट पक्राउ गरियो। पुलिसको सोधपुछपछि आज बिहान प्रीतिका र रुस्तमलाई पनि पक्राउ गरिएको छ। सम्पूर्ण घटनालाई लिएर आज डीसीपी ईस्ट राकेश सिंहले पत्रकार सम्मेलन गरे।