जलपाइगढी: डुवर्सको लाटागढी रेञ्जका वनकर्मीहरूले तस्करी गर्नु अघि छाला सहित एउटा उड्ने लोथर्के (Flying Squirrel) उद्धार गरेका छ भने यस घटनामा तीन जनालाई पक्राउ पनि गरिएको छ। लाटागुडी रेञ्जका वनकर्मीहरूले मालबजार नजिकैको क्षेत्रमा अभियान चलाएर छाला सहित उड्ने लोथर्के उद्धार गरेको छ। यस घटनामा तीन जना जतन छेत्री, अरन गिरी र प्रेम प्रधानलाई पक्राउ गरिएको छ। यी तीनै जना सिक्किम निवासी बताइएको छ। लाटागढी रेञ्जका रेञ्जर सञ्जय दत्तले बताए अनुसार उनीहरूलाई गोप्य स्रोतबाट सिक्किमबाट उड्ने लोथर्केको छालाको तस्करी गरिने जानकारी प्राप्त भएको थियो। त्यसै जानकारीको आधारमा उनीहरू खरीददारको रुपमा ती व्यक्तिहरूकहाँ पुगे र त्यहाँबाट छाला सहित उड्ने लोथर्के उद्धार गरे। यसको साथै यस घटनामा संलग्न एउटा वाहन पनि जफत गरिएको छ।